Քննարկվո՞ւմ է Իտալիայի հետ օդային հաղորդակցությունը սահմանափակելու հարցը. Մնացականյանը պարզաբանում է

Հաշվի առնելով Իտալիայում կորոնավիրուսով հիվանդացության դեպքերի ի հայտ գալը՝ արդյոք քննարկվո՞ւմ է Իտալիայի հետ օդային հաղորդակցությունը սահմանափակելու հարցը:

Պատասխանելով այս հարցին՝ ՀՀ ԱԳ նախարարը նկատեց՝ կորոնավիրոսը մարտահրավեր է բոլոր երկրների համար, և կարևորագույն մոտեցում է այստեղ համագործակցության միջոցով գտնել ճանապարհները՝ այդ վարակը վերահսկելու, կանխարգելելու և հաղթահարելու:

«Մենք սերտորեն աշխատել և աշխատում ենք Չինաստանի հետ, Իրանի հետ: Այստեղ էական է, որ համագործակցում և սերտ աշխատում ենք մեր բարեկամ Իրանի իշխանության, ժողովրդի, կառավարության հետ՝ միասին գտնելու այս ուղղությամբ լավագույնս աշխատելու ճանապարհները: Ինչ վերաբերում է Իտալիայում կորոնավիրուսի դեպքերին, սա ևս չէր կարող վրիպել մեր ուշադրությունից, այստեղ ևս մենք գնահատում ենք, թե ինչ քայլեր է անհրաժեշտ ձեռնարկել, որ նույնպես, նորից, միասնաբար հաղթահարենք, միասին աշխատենք, որ թույլ չտանք համաճարակի տարածումը և հաղթահարենք դա միասին:

Սա է մոտեցումը, տրամաբանությունը, կոնկրետ քայլեր ձեռնարկվում են, վերջին զարգացումների հետ կապված, մյուս օջախների հետ կապված նույնպես քննարկումներ ունենք՝ հասկանալով, որ ժամանակը նշանակություն ունի, և որ ժամանակի կորուստ չի կարելի թույլ տալ»,- ասաց Մնացականյանը: