![Սյունիքի մարզպետարանը հորդորում է ռիսկի չդիմել ու չերթևեկել Գորիս-Սիսիան ճանապարհով](https://auroranews.am/storage/img/base_image/old/fcb9c6e06d7730c965f3afe18711bde5.webp)
Սյունիքի մարզպետարանը հորդորում է ռիսկի չդիմել ու չերթևեկել Գորիս-Սիսիան ճանապարհով
![Սյունիքի մարզպետարանը հորդորում է ռիսկի չդիմել ու չերթևեկել Գորիս-Սիսիան ճանապարհով](https://auroranews.am/storage/img/base_image/old/fcb9c6e06d7730c965f3afe18711bde5.webp)
Սյունիքի մարզպետարանը հաղորդագրություն է տարածել՝ տեղեկացնելով, որ փետրվարի 11-ի երեկոյից մինչ այժմ սաստիկ բքի պատճառով շարունակում է փակ մնալ Մ2 միջպետական մայրուղու Գորիս-Սիսիան ճանապարհահատվածը։
«Խորհուրդ է տրվում ռիսկի չդիմել ու չերթևեկել նշված ճանապարհով։ Ճանապարհաշինական կազմակերպություններն իրենց տեխնիկայով պատրաստ են սկսել ճանապարհի մաքրման աշխատանքները՝ բուքը դադարելուն պես․ այս պահին ճանապարհին հնարավոր չէ աշխատանք իրականացնել ուժեղ քամու պատճառով։ ՀՀ ՃՈ և ԱԻՆ աշխատակիցները շարունակում են շուրջօրյա հերթապահությունը ճանապարհին, ինչպես նաև ուժեղացված ռեժիմով աշխատում են Սիսիանի ու Գորիսի բժշկական կենտրոնների շտապ օգնության ծառայությունները՝ անհրաժեշտության դեպքում տեղում լինելու համար։
Տեղեկացնում ենք նաև, որ Սյունիքի մարզպետարանի ներկայացուցիչները, Գորիսի ու Սիսիանի համայնքապետերն այս պահին տեղերում են ու պարբերաբար շրջայցեր են կատարում և պատրաստ են հոգալ այն քաղաքացիների մասին, որոնք մնացել են ճանապարհին ու աջակցության կարիք ունեն։
Նշենք, որ չնայած մարդիկ տեղեկացվում են, որ չարժե շարունակել ճանապարհն ու նշված կառույցները պատրաստ են քաղաքացիներին ապահովել նաև կացարանուվ ու սննդով, բայց շատերը շարունակում են երթևեկել։ Եվս մեկ անգամ հորդորում ենք՝ պահպանել զգուշություն ու շարունակել ճանապարհը եղանակային պայմանների լավացումից հետո, իսկ օգնության կարիք ունեցող քաղաքացիները կարող են դիմել Սյունիքի մարզպետարան ու Գորիսի և Սիսիանի համայնքապետարաններ»,- տեղեկացնում են մարզպետարանից։
![](https://www.shantnews.am/wp-content/uploads/2020/02/84439522_1050612831985901_5569434017146601472_o.jpg)