Ադրբեջանցիներն այն ժամանակ կարող են կոչվել Արցախի համայնք, երբ գան, դառնան Արցախի քաղաքացի. Թեւան Պողոսյան

Այո, ազգությամբ ադրբեջանցին կարող է գնալ Արցախում բնակություն հաստատել, բայց դրա համար կա գործընթաց. որ երկրի քաղաքացի էլ լինի, պետք է այդ երկրի քաղաքացիությունից հրաժարվի, դիմի Արցախը նախագահին եւ ընթացակարգով ստանա քաղաքացիություն: Այս մասին այսօր՝ փետրվարի 8-ին, լրագրողների հետ զրույցում նշեց «Մարդկային զարգացման միջազգային կենտրոն» ՀԿ նախագահ, ՀՀ նախագահի խորհրդական Թեւան Պողոսյանը: 

«Իր դիմումի վերեւում պետք է գրի՝ Արցախի նախագահ Բակո Սահակյանին, խնդրի, ասի՝ ուզում եմ դառնալ Արցախի Հանրապետության քաղաքացի: Բոլոր թղթերը ներկայացնի, վերջում էլ հայոց լեզվից քննություն հանձնի, ու եթե բոլոր ընթացակարգերը անցնի, կարող է ստանալ քաղաքացիություն: Հիմա եթե այդ ամենը կանի եւ կստանա Արցախի քաղաքացիություն, կարող է ապրել, որտեղ ուզում է: Այսօր Արցախի շատ քաղաքացիներ ապրում են Հայաստանում»,-ասաց նա: 

«Ընդհանրապես երբ փորձում են որպես գործոն ներկայացնել Արցախի ադրբեջանական համայնքի թեման, ես ասում եմ, որ իրենք այն ժամանակ կարող են կոչվել համայնք, երբ գան, դառնան Արցախի քաղաքացի, հետո այդ անձնագրերով գնան Ադրբեջան ապրելու: Իրենք ունեն Ադրբեջանի քաղաքացու անձնագիր, իրենց քաղաքացիներն են, ի՞նչ համայնք: Մենք պետք է այդ թեման փակել տանք, որովհետեւ Ադրբեջանն այդ տեղեկատվական պատերազմում շատ իմպուլսիվ դրա վրա աշխատում է»,-ասաց Թեւան Պողոսյանը՝ հավելելով, որ Արցախի հարցը չի լուծվելու բանակցային գործընթացի ինչ-որ սենյակում, դա լուծվելու է մեր տնային աշխատանքը ճիշտ կատարելով, թե տնտեսական, թե ռազմական առումով հզորանալով: