Զինծառայողի մահվան դեպքով Առաքել Մովսիսյանի որդուց բացի՝ մեղադրանք է առաջադրվել ևս երկու հոգու

ՀՀ Քննչական կոմիտեի դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանը տեղեկացնում է, որ պարտադիր ժամկետային զինծառայող, շարքային Վահրամ Մկրտիչի Ավագյանի մահվան դեպքի առթիվ առաջին կայազորային քննչական բաժնում քննվող քրեական գործով պարտադիր ժամկետային զինծառայողներ, շարքայիններ Խ. Գ.-ին և Ա. Ս.-ին մեղադրանք է առաջադրվել ՀՀ քրեական օրենսգրքի 359-րդ հոդվածի 3-րդ մասով, այն է՝ զինծառայողների փոխհարաբերությունների կանոնագրքային կանոնները խախտելը նրանց միջև ստորադասության (ենթակայության) հարաբերությունների բացակայության դեպքում, որն անզգուշությամբ առաջացրել է ծանր հետևանքներ:

«Վերջիններիս նկատմամբ որպես խափանման միջոց կալանավորումը ընտրելու համար միջնորդություն է ներկայացվել դատարան»,- նշել է Հարությունյանը:

Auroranews-ը դեռևս  չկարողացավ կապ հաստատել  Քննչական կոմիտե ճշտելու` արդյոք մտադիր են մեղադրանք առաջադրել Սպարտակ Արթուրի Ավետիսյանին, որը ձերբակալվածներից մեկն էր և արդյոք  Auroranews -ի հրապարակումից հետո է Ա․ Ս․-ն  կցվել քրեական գործին:

Հիշեցնենք, որ ավելի վաղ պարտադիր ժամկետային զինծառայող, շարքային Վահրամ Մկրտիչի Ավագյանի մահվան դեպքի առթիվ քննվող քրեական գործով մեղադրյալ Դավիթ Մովսիսյանի նկատմամբ որպես խափանման միջոց է ընտրվել կալանավորումը: