ԼՈՒՍԱՆԿԱՐՆԵՐ. Արտակարգ դեպք Կոտայքի մարզում. 4 հազարից ավել իշխան տեսակի ձկներ են սատկել
Այսօր՝ հունվարի 16-ին, արտակարգ դեպք է տեղի ունեցել Կոտայքի մարզում։ Գետամեջ գյուղում գտնվող Եղունարք գետի հարևանությամբ գտնվող ձկների համար նախատեսված մի քանի ավազաններում կասկածելի հանգամանքներում 4 հազարից ավելի «Իշխան» տեսակի ձկներ սատկել են։
Ինչպես տեղից հայտնում է ֆոտոլրագրող Գագիկ Շամշյանը, սատկել են ոչ միայն ավազաններում գտնվող ձկները, այլ նաև գետում եղած ձկները։ արդեն փաստի առաջ են կանգնել։ Մարդիկ փաստի առաջ են կանգնել:
Ֆոտոլրագրողի հետ զրույցում բնակիչներն ասում էին. «Ժամը 4-ի կողմերը էկանք, որ հերթական կերը տանք ձկներին և գետին ու բասեիններին չհասած՝ տհաճ հոտ զգացինք, ու մոտենալով արդեն նշված վայր՝ ականատես եղանք ձկների համատարած անկմանը։ Մենք վստահ ենք, որ մեր անփութությունն այստեղ չկա, պարզապես պատասխանատուները պետք է շտապ միջոցներ ձեռնարկեն՝ ջրից վերցնեն նմուշներ և մի քանի սատկած ձուկ էլ տանեն ու կատարեն փորձաքննություն, ինչից հետո, վստահ ենք՝ եթե ցանկություն ունենան, ժամերի ընթացքում կբացահայտեն, թե որտեղից էր այդ նեխած, փռփռոտ սև ջուրը լցվում գետը»։ Ֆոտոլրագրողը հայտնում է նաև, որ ձկան պահպանմամբ զբաղվողները կրել են մոտ 5-6 մլն դրամի վնաս, քանի որ դրա մեջ մտնում է ձկների՝ առաջին օրվանից պահելու պրոցեսի ծախսը։
