«The New York Times»-ի շաբաթվա առաջարկների մեջ Հայոց ցեղասպանության մասին պատմող գիրքն է

Հեղինակավոր «The New York Times» պարբերականն այս շաբաթվա համար առաջարկվող 11 գրքերի ցանկում ներառել է նաև Քրիս ՄըքՔորմիկի «THE GIMMICKS» (թարգմանաբար նշանակում է հնարքներ) գիրքը, որում իրադարձությունները ծավալվում են Հայաստանում, գրքում հիշատակվում է նաև Հայոց ցեղասպանությունը:

Ինչպես փոխանցում է «Արմենպրես»-ը, պարբերականը գրքի անոտացիայում նշում է՝ ՄըքՔորմիկի նովելն սկսվում է Օսմանյան կայսրության կողմից իրականացված Հայոց ցեղասպանությունից մոտ 60 տարի անց՝ վաղ 1970-ականներին Կիրովականում տեղի ունեցած դեպքերի նկարագրությամբ: Պատմվում է Խորհրդային Հայաստանում երկու զարմիկների մասին. նրանք միմյանց սիրում էին հարազատ եղբայրների պես: 

Նրանցից մեկը Ռուբեն Պետրոսյանը, որը խոստումնալից նարդի խաղացող էր, հետաքրքրված էր քաղաքականությամբ, իսկ Ավո Գրեգորյանը՝ գրավիչ մի երիտասարդ, աստիճանաբար դառնում է պրոֆեսիոնալ ըմբիշ Միացյալ Նահանգներում:

Քրիս ՄըքՔորմիկը ծնունդով Կալիֆոռնիայից է, սակայն նրա մայրն ԱՄՆ-ում հաստատվել է Հայաստանից: Քրիսն այժմ Մինեսոտա նահանգի համալսարանի դոցենտ է: