Կերակրողին կորցրած ուսանողների նպաստը ստանալու ժամկետը կարող է երկարաձգվել

ԱԺ առողջապահության և սոցիալական հարցերի հանձնաժողովն այսօր քննարկել է Պետական կենսաթոշակների մասին ՀՀ օրենքում փոփոխություններ կատարելու մասին նախագիծը: Հայկ Կոնջորյանի և Նարեկ Զեյնալյանի հեղինակած այս նախագծով առաջարկվում է կերակրողին կորցնելու դեպքում համալսարանում առկա ուսուցմամբ սովորող երեխաներին տրամադրվող աշխատանքային կենսաթոշակ ու նպաստ ստանալը երկարաձգել՝ 23 տարեկանից դարձնելով 26 տարեկան:

Կոնջորյանի համոզմամբ՝ երբ կրթությունը դարձել է տասներկուամյա, փոփոխության արդյունքում եղել են ուսանողներ, որոնք 23 տարին լրանալուց հետո սովորել են, բայց օրենքի բացի պատճառով չեն ստացել նպաստը: Առաջարկվում է, որ այս օրենքում նպաստը տրվի ոչ թե մինչև 23 տարեկանը, այլ՝ մինչև 26:

«Սա հաշվարկված է այնպես, որ բոլոր ԲՈՒՀ-երում 18 տարեկանից սկսած այդ ուսանողները, նաև նրանք, ովքեր անցնելու են պարտադիր զինվորական ծառայության, իրացնեն իրենց իրավունքը»,-ասաց Կոնջորյանը՝ հավելելով, որ այս օրենքը գործում է միայն այն դեպքում, երբ քաղաքացին դեռ ուսանող է:

Նախագիծը միաձայն ընդունվեց հանձնաժողովի անդամների կողմից: