Թեհրանում կործանված ուկրաինական Boeing-ը հրդեհվել է օդում՝ ցամաքի հետ բախվելուց առաջ:

Այս մասին ասված է Իրանի քաղաքացիական ավիացիայի կազմակերպության ներկայացրած հաշվետվության մեջ:

«Ականատեսների փոխանցմամբ՝ կրակը տեսանելի է եղել ինքնաթիռի վրա դեռ օդում եւ տարածվել է ամբողջ դիմամասով»,- մանրամասնում են փաստաթղթում:

Գերատեսչությունում կարծում են, որ, ինքնաթիռի կործանման տարբեր մանրամասներ միացնելով, կարելի է ենթադրել, որ անսարքություններ տեսնելով՝ անձնակազմն արագ հետադարձ է կատարել՝ օդանավակայան վերադառնալու համար: Բացի այդ՝ օդաչուները չեն հայտնել կամ չեն հասցրել հայտնել ինքնաթիռում հայտնաբերած անսարքության մասին:

Հիշեցնենք՝ ողբերգությունը տեղի էր ունեցել նախօրեին. «Ուկրաինական ավիաուղիներ»-ին պատկանող Boeing 737-800 ինքնաթիռը, որն իրականացնում էր Թեհրան-Կիեւ չվերթը, կործանվել է Իմամ Հոմեյնիի անվան օդանավակայանից դուրս գալուց 2 րոպե անց:

Աղետի արդյունքում զոհվեց 176 մարդ: Նախնական վարկածով՝ օդանավի վթարման պատճառ է եղել շարժիչի բռնկումը: