Իրանի նախագահը հայտարարել է աշխարհում տեղի ունեցող «կարևոր փոփոխությունների» մասին

Իրանի նախագահ Հասան Ռոհանին հայտարարել է, որ տարածաշրջանում և աշխարհում կարևորագույն փոփոխություններ են տեղի ունեցել գեներալ Ղասեմ Սոլեյմանիի սպանությունից հետո: Այս մասին տեղեկացնում է РИА Новости գործակալությունը՝ հղում անելով Իրանի նախագահի պաշտոնական կայքին:

«Նախագահ Հասան Ռոհանին հայտարարել է, որ սկսած անցյալ շաբաթվանից` Իրանում, տարածաշրջանում և աշխարհում կարևորագույն փոփոխություններ են նկատվում»,-ասված է Իրանի նախագահի կայքում տեղակայված հաղորդագրության մեջ:

Իրաքի արևմուտքում գտնվող ամերիկյան «Այն ալ-Ասադ» ռազմակայանը հրթիռակոծվել է: Իրանի Իսլամական հեղափոխության պահապանների կորպուսը ստանձնել է Իրաքում ամերիկյան ավիաբազային հասցված հրթիռային հարվածի պատասխանատվությունը:

Հունվարի 3-ին Բաղդադում սպանվել է Իրանի իսլամական հեղափոխության պահապանների կորպուսի գեներալ Ղասեմ Սոլեյմանին: Գեներալի սպանությունից հետո, Իրանի ԱԳՆ է կանչվել Շվեյցարիայի դեսպան Մարկուս Լեյթները, որը ներկայացնում է ԱՄՆ շահերը Թեհրանում:

Հաղորդվում է նաև, որ ԱՄՆ Զինված ուժերը բարձր մարտունակության են բերվել իրանցի գեներալի սպանությունից հետո:

Իրանի գերագույն հոգևոր առաջնորդ այաթոլլահ Ալի Խամենեին խոստացել է վրեժ լուծել Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանության համար: