Բողոք-ահազանգ․ քաղաքացիներին աշխատավայր հասցնող միակ երթուղայինը փոխել է երթուղին

Քիչ առաջ Auroranews-ը բողոք-ահազանգ ստացավ Երևանի Արին Բերդի փողոցում գործող գործարանների աշխատակիցներից։ Վերջիններս նշեցին, որ տոներից հետո փաստի առաջ են կանգնել, քանի որ աշխատավայր հասցնող միակ՝ 38 համարի միկրոավտոբուսը փոխել է երթուղին։ «Տարածքում մեծ թվով գործարաններ կան, խոշոր առևտրի կենտրոն, պատկերացնո՞ւմ եք, թե քանի մարդ է օգտվում այդ երթուղայինից։ Այս պահին ստիպված երթևեկում ենք տաքսինեով, բայց, բոլորիս էլ հասկանալի է, թե դա ինչ մեծ ծախս է ենթադրում»,- նշեցին քաղաքացիները՝ հավելելով, որ խնդրով զանգահարել են քաղաքապետարան, հայտնել իրենց մտահոգության մասին։ 

«Քաղաքապետարանից ասացին, որ այլընտրանք են փնտրում, կփորձեն լուծել խնդիրը, սակայն որևէ ժամկետ չնշեցին»,- ասացին քաղաքացիները։ Auroranews-ն իր հերթին կապ հաստատեց Երևանի քաղաքապետարանի մամուլի խոսնակ Հակոբ Կարապետյանի հետ՝ հասկանալու համար, թե ի՞նչ ընթացք է տրվելու հարցին։ Խնդիրն ավելի մանրամասն ուսումնասիրելու համար, պարոն Կարապետյանը խնդրեց իրենց դիմել գրավոր տարբերակով։