Ողբերգական ավտովթար Գեղարքունիքում. կա 1 զոհ և 5 վիրավորներ

Այսօր՝ հունվարի 8-ին, խոշոր ու ողբերգական ավտովթար է տեղի ունեցել Գեղարքունիքի մարզում։ Ժամը 16:30-ի սահմաններում Սևան-Շորժա-Ճամբարակ ավտոճանապարհի 18 կմ հատվածում ճակատ-ճակատի բախվել են ВАЗ 2107 մակնիշի և Opel Astra մակնիշի ավտոմեքենաները։ Այս մասին հայտնում է Shamshyan.com-ը: 

Վթարի հետևանքով տուժածները մարմնական վնասվածքներով տեղափոխվել են՝ 2-ը՝ Ճամբարակի, 4-ը՝ Սևանի բժշկական կենտրոններ։ Վիրավորներին առաջինը օգնության են հասել քաղաքացիները, այդ թվում՝ Սևան քաղաքի մի խումբ երիտասարդներ, որոնք հենց իրենք են առաջին անհրաժեշտ օգնությունը ցուցաբերել, մինչև կժամանեին բժիշկները։

Դեպքի վայր են ժամանել ճանապարհային ոստիկանության ծառայողները։ Մինչ դեպքի վայրում աշխատում էր ՃՈ ավագ հետաքննիչը, Ճամբարակի բժշկական կենտրոնից ահազանգ ստացվեց, որ վիրավորներից մեկը, գիտակցության չգալով, մահացել է։ 

Փաստի առթիվ Սևանի քննչական բաժնում ՀՀ քր. օր-ի 242 հոդվածի 2-րդ մասի հատկանիշներով հարուցվել է քրեական գործ։ Ոստիկանությունն ու քննչական բաժինը պարզում են վարորդների, մահացածի և վիրավորների ինքնությունը։