16-ամյա աղջկան շահադիտական դրդումներով սպանելու համար ձերբակալվածին մեղադրանք է առաջադրվել

16-ամյա աղջկա սպանության համար Ռաֆայել Սուքիասյանին մեղադրանք է առաջադրվել ՀՀ քրեական օրենսգրքի 104 հոդվածի 2-րդ մասի 8-րդ կետով (սպանություն, որը կատարվել է շահադիտական դրդումներով):

Այս մասին ՀԺ-ի հարցին ի պատասխան ասաց ՀՀ քննչական կոմիտեի դեպարտամենտի տեղեկատվության եւ հասարակայնության հետ կապերի բաժնի պետ Նաիրա Հարությունյանը:

Նա տեղեկացրեց, որ Սուքիասյանին կալանավորելու միջնորդություն է ներկայացվել դատարան:

Հիշեցնենք, որ 16-ամյա աղջիկը սպանվելէ հունվարի 5-ին, ժամը 23։00-ի սահմաններում: Դատաբժշկի նախնական եզրակացության համաձայն՝ աղջիկը մահացել է խեղդամահ արվելու հետեւանքով։ 

Ըստ ոստիկանության, Սուքիասյանը ձերբակալվել է սպանության հաջորդ օրը քաղաքի կենտրոնից՝ Աբովյան փողոցից, խուզարկության ժամանակ էլ նրա մոտ հայտնաբերվել է սպանված աղջկա պլանշետը, նա տվել է ինքնախոստովանական ցուցմունք։

Ռաֆայել Սուքիասյանը պայմանագրային հիմքունքներով ծառայում էր ՊՆ-ում:

Ըստ ոստիկանության հաղորդագրության՝ 16-ամյա աղջիկը վարձով էր ապրում, այն բնակարանում որտեղ սպանվել է: