ԱՄԷ դեսպանը տարեվերջյան ընդունելություն էր կազմակերպել ԶԼՄ-ների համար

Հայաստանի Հանրապետությունում Արաբական Միացյալ Էմիրությունների դեսպան Ն․Գ․ Մուհամմադ Իսա ալ Կատտամ ալ Զաաբին տարեվերջյան ընդունելություն էր կազմակերպել ԶԼՄ ներկայացուցիչների համար:

Նա շնորհակալություն հայտնեց ներկաներին հրավերն ընդունելու համար և Էմիրությունների կառավարության անունից շնորհավորական խոսք հղեց Հայաստանի ժողովրդին:

«Սա անվտանգության, հարգանքի և սիրո տարի էր, և այս ուղերձը հղում ենք աշխարհի բոլոր երկրներին: 2019 թվականը մեր երկրում հայտարարվել էր Հանդուրժողականության տարի, և այդ նախաձեռնությունն Էմիրություններում սկսել էր ԱՄԷ նախագահ Խալիֆա բին Զայեդ ալ Նահյանը»,- նշեց ալ Զաաբին:

Նա շնորհակալություն հայտնեց բոլոր լրագրողներին իրենց գործադրած ջանքերի, հավուր պատշաճի միջոցառումները լուսաբանելու համար: Դեսպանն ընդգծեց, որ ԶԼՄ-ների հետ համագործակցությունը նույնպես նպաստել է, որպեսզի իրենք մեծ արդյունքներ ունենան: Մուհամմադ ալ Զաաբին ցանկություն հայտնեց ապագայում նույնպես շարունակել այդ համագործակցությունը:

«Հայաստանում եղած այս 9 ամսվա ընթացքում ես ինձ միշտ ապահով եմ զգացել և Կառավարության կողմից մշտապես աջակցություն եմ ստացել: Հայաստանի և ԱՄԷ-ի միջև տնտեսական ոլորտում համագործակցությունը բավականին լավ է, և այստեղ գործում են 5 էմիրաթական ընկերություններ»,- շեշտեց դեսպանը և հավելեց, որ երկու երկրի միջև ամուր հարաբերությունների ապացույցներից մեկն էլ այն է, որ շաբաթական 12 չվերթ է իրականացվում դեպի Շարժա և Դուբայ:

Մուհամմադ ալ Զաաբին հայտնեց, որ Հայաստանում իր գործունեության ընթացքում երկրների միջև մի շարք համաձայնագրեր են ստորագրվել: