Պետական բյուջեն վերականգնվել է ավելի քան 4 միլիարդ դրամով. Խաչատրյան

Միայն այս տարվա ընթացքում Հատուկ քննչական ծառայության վարույթում քննվող քրեական գործերով պետական բյուջե է վերականգնվել աննախադեպ թվով վնաս՝ 4.331.935 ՀՀ դրամ, որը 7 անգամ ավելին է, քան ՀՔԾ գոյության 11 տարիների ընթացքում քննված գործերով վերականգնված ողջ գումարը՝ 597.698.000 ՀՀ դրամը: 

Այս մասին քիչ առաջ հայտարարեց Հատուկ քննչական ծառայության պետ Սասուն Խաչատրյանը ՀՔԾ աշխատակցի օրվա առթիվ կազմակերպված միջոցառման ժամանակ:

Սասուն Խաչատրյանը նշեց, որ դա միայն պետական բյուջե փոխանցված գումարն է, եւ դրանից բացի՝ բազմաթիվ ավելի թվով կալանք է դրվել քրեական գործերով անցնող անձանց անշարժ գույքի, ինչպես նաեւ՝ հանցագործության սուբյեկտ հանդիսացած ակտիվների վրա, որոնց ընթացքը կլուծվի դատական ակտերով:

Իր ելույթում ՀՔԾ պետը կարեւորեց, որ թեեւ 11 տարի ավանդույթի ուժով նշվել է ՀՔԾ աշխատակցի տոնը, սակայն այսօր արդեն դրվել է դրա պաշտոնական հիմքը, ինչի առթիվ նա շնորհավորական ուղերձ հղեց. «Մյուս իրավապահ մարմինների համեմատ՝ ՀՔԾ-ն բավականին երիտասարդ է, սակայն կարող ենք փաստել, որ այն արդեն կայացած կառույց է եւ պատվով իրականացնում է իր առաքելությունը: ՀՔԾ ծառայողները քաջ գիտակցում են իրենց վերապահված առաքելության բացառիկությունը, քանի որ փոքր եւ մեծ սխրանքների տեղ կա յուրաքանչյուր մասնագիտության մեջ, եւ մենք պարտավոր ենք մասնագիտությանը վերաբերվել այդ փիլիսոփայությամբ: Գուցե մի փոքր անհամեստ է հնչում, սակայն կարծում եմ, որ յուրաքանչյուր ոք պետք է համոզված լինի իր կողմից կատարվող աշխատանքի բացառիկության մեջ»:

Սասուն Խաչատրյանի խոսքով՝ ՀՔԾ քննիչի աշխատանքը պահանջում է ուժերի գերլարում, ստեղծագործականություն, ծանր պատասխանատվություն՝ ընտանիքի, հանգստի հաշվին, եւ այստեղ նշանակալի հաջողություններ գրանցում են միայն նվիրյալները, ինչպիսիք, ըստ ՀՔԾ պետի, շատ են:

Խաչատրյանը ներկայացրեց հակիրճ վիճակագրություն այս տարվա 11 ամիսների ընթացքում քննված քրեական գործերի մասին. «Այս տարի ՀՔԾ վարույթում քննվել է 655 քրեական գործ, որոնցից 536-ի ընթացքը լուծվել է, իսկ 71-ը՝ 115 անձի վերաբերյալ, մեղադրական եզրակացությամբ ուղարկվել է դատարան: Նույն ժամանակահատվածում Ծառայության քննիչների կողմից նախապատրաստվել է 439 նյութ, հարուցվել՝ 261 քրեական գործ, ստացվել եւ քննարկվել՝ 2544 դիմումներ»: