Ես այն կարծիքին չեմ եղել, որ իմ ներկայացրած նախագծերը մատաղի նման լրիվ ընդունելի պիտի լինեն. Պետրոսյան

«Պարոն Պետրոսյանը հազիվ մի հատ նորմալ նախագիծ ա բերել, էնքան խուճուճ հարց տվեցիք»,- Ազգային ժողովում մտքերի փոխանակման փուլում պատգամավոր Նարեկ Զեյնալյանը անդրադարձավ Գեւորգ Պետրոսյանի նախագծին, ըստ որի առաջարկվում է, որ մինչեւ կարգապահական տույժի կիրառումը, գործատուն պետք է աշխատողից գրավոր կերպով պահանջի խախտման մասին գրավոր բացատրություն:

Ըստ Զեյնալյանի՝ խնդիրն այն է, որ գործատուները հիմնականում նախընտրում են բանավոր պահանջել, որը հետագայում դատարանում հնարավոր չի լինում ապացուցել ոչ գործատուի կողմից, ոչ աշխատողի կողմից: «Հանձնաժողովում միաձայն կողմ ենք քվեարկել, դրական եզրակացություն ենք տվել նախագծին»,-եզրափակեց Զեյնալյանը:

Գեւորգ Պետրոսյանի կարծիքով ցանկացած օրենսդրական կարգավորում պետք է անել աշխատողի եւ գործատուի օրինական շահերի զուգակցման սկզբունքով եւ սա այդ դեպքն է: «Հետո, ես այն կարծիքին չեմ եղել, որ իմ ներկայացրած օրենսդրական նախագծերը մատաղի նման լրիվ ընդունելի պիտի լինեն: Կարող են եւ վիճելի լինել, եւ անընդունելի»,-կատակելով ասաց Պետրոսյանը:

«Իմ քայլը» խմբակցության պատգամավոր Սուրեն Գրիգորյանը նույնպես անդրադարձավ այս նախագծին: «Ժողովուրդ ջան, ես գիտեմ, որ տպավորությունն այն է, որ արդեն բոլորն ամեն ինչ հասկացել են, բայց ես օրինակով բերեմ, որովհետեւ մի քիչ կասկածում եմ»:

Ըստ Գրիգորյանի օրինակի՝ աշխատակցից չեն ուզել բացատրագիր, աշխատանքից ազատել են, հետագայում՝ դատարանում, նույն ընկերության երկու աշխատակիցներ եկել ցուցմունք են տվել, ասել են՝ բանավոր մենք լսել ենք, որ խնդրել են բացատրություն: 

Հարցին, թե ինչ լեզվով են ասել այդ ամենը, պատասխանել են, թե՝ հայերեն: «Ոչի՞նչ, որ էդ մարդը հայերենին չի տիրապետում»,-ասաց Գրիգորյանը, հավելելով, որ սա իրոք շատ կարեւոր նախագիծ է այն առումով, որ մի թղթով հետագայում մի ամբողջ բյուրոկրատիա է կանխվում: