Սիրիայի նախագահը ցավակցություն է հայտնել հայ քահանայի սպանության կապակցությամբ

Սիրիայի նախագահ Բաշար Ասադը ցավակցություն է հայտնել Ղամիշլիի Հայ կաթողիկե եկեղեցու հոգևոր հովիվ Հովսեփ քահանա Պետոյանի ու նրա հոր սպանության կապակցությամբ:

 Նախագահի ցավակցությունը քահանայի ընտանիքին և Կամիշլիի Հայ կաթողիկե համայնքի առաջնորդ Անդրանիկ ծայրագույն վարդապետ Այվազյանին է փոխանցել Սիրիայի իշխող «Բաաս» կուսակցության գլխավոր քարտուղարի օգնական Հիլալ ալ-Հիլալը, հայտնում է RegionMonitor-ը: Նա նշել է, որ հոգևորականներին թիրախավորելը նպատակ է հետապնդում լռեցնելու մարդկանց, որոնք համերաշխության, սիրո և խաղաղության կոչ են անում: Նրա խոսքերով՝ կատարվածը սիրիական հասարակության մեջ պառակտում առաջացնելու հուսահատ փորձ է: 

Հիշեցնենք, որ ահաբեկիչները նոյեմբերի 11-ին Դեր Զորի ճանապարհին կրակ էին բացել քահանայի մեքենայի ուղղությամբ, ինչի հետևանքով հոգևոր հովիվը և նրա հայրը տեղում մահացել էին, իսկ նրանց ընկերակցող սարկավագ Ֆադի Սանոն՝ վիրավորվել: Հոգևորականները Դեր Զոր էին գնում՝ տեղի եկեղեցու վերանորոգման աշխատանքներին ծանոթանալու համար։ ԻՊ-ն ավելի ուշ ստանձնել էր հայ քահանաների սպանության պատասխանատվությունը: