Ամեն ինչի համար պետք է պատասխան տրվի, ես չգիտեմ՝ կլինի քրեական, վարչական, քաղաքական, թե բարոյական. վարչապետ
Տարեցների խնամքի, գիշերօթիկ հաստատությունների, առանց ծնողական խնամքի մնացած երեխաների խնամքի գործող այսօրվա համակարգերը հուսահատության համակարգեր են:
Այս մասին ՀՀ կառավարության այսօրվա նիստում ասաց վարչապետ Նիկոլ Փաշինյանը:
«Քննադատությունները շատ ուշադիր պետք է լսենք, բայց նրանք, ովքեր պիտի ասեն՝ վայ, էս մեր աշխատատեղը կրճատում եք, էս ի՞նչ եք անում գիշերօթիկ հաստատության հետ, դա չի լսվելու, որովհետեւ նրանցից պատասխան ենք պահանջելու, թե այդ երեխաների, ծերերի նկատմամբ ի՞նչ խնամք է տեղի ունեցել»,- ասաց վարչապետը:
«Ո՞նց եղավ, որ մի տարվա մեջ կենսաթոշակների ու նպաստների համակարգում 3-4 միլիարդ դրամ կարելի է խնայել: Բա ո՞ւր են եղել նախկին տարիներին այդ 3-4 միլիարդները. որովհետեւ ամբողջ համակարգը ծառայեցվել է մի բանի՝ հնարավորինս հուսահատեցնել մարդկանց, նրանց հնարավորինս ծնկած վիճակի բերել»,- ասաց վարչապետը:
Նիկոլ Փաշինյանն ընդգծեց՝ թող բոլորը հիշեն՝ ոչ մի բան չի մոռացվում, ոչինչ չի մոռացվում:
«Ամեն ինչի համար պետք է պատասխան տրվի, ես չգիտեմ՝ էդ պատասխանատվությունը կլինի քրեական, վարչական, քաղաքական, թե բարոյական, բայց պատասխանատվությունն անխուսափելի է»,- ասաց վարչապետը՝ հավելելով. «Ասում եմ՝ դուխով շարունակեք»:
