Տուժած ոստիկանը գլխուղեղի ցնցում ունի․ մանրամասներ

Այսօր գիշերը Ազատության պողոտայում տեղի ունեցած միջադեպի հետեւանքով տուժած ոստիկանը (Ա. Հակոբյան) գտնվում է Սուրբ Գրիգոր Լուսավորիչ բժշկական կենտրոնում:

Կենտրոնի մամուլի խոսնակ Ծովինար Նազարյանը Հայկական ժամանակի հետ զրույցում հայտնեց, որ ոստիկանն իրենց մոտ տեղափոխվել է գիշերը ժամը 5-ին: «Մեզ մոտ է տեղափոխվել գլխի շրջանում պատռված վերքով, փափուկ հյուսվածքների սալջարդով, գլխուղեղի ցնցումով: Վիճակն այս պահին գնահատվում է բավարար, գտնվում է նեյրովիրաբուժական բաժանմունքում»,- ասել է Խաչատրյանը:

Հիշեցնենք, որ ըստ ոստիկանության լրատվական ծառայության հաղորդագրության՝ գիշերը՝ ժամը 04:30-ի սահմաններում, ոստիկանության պետական պահպանության գլխավոր վարչության Արաբկիրի պահպանության բաժնի գիշերային ծառայություն իրականացնող կարգախմբերից մեկի ոստիկանները «Հաղթանակ» զբոսայգու մուտքի մոտ նկատել են երկու անձի։ Վերջիններս, տեսնելով պարեկային մեքենան, փախչել են։ Ոստիկանության ծառայողները հետապնդել են նրանց և Ազատության պողոտայում բռնել։ Բռնված անձինք դիմադրել են։

Այդ ընթացքում նրանցից մեկը խլել է ոստիկաններից մեկի հաշվեցուցակային ատրճանակն ու կրակել նրանցից մեկի վրա, ինչպես նաև ատրճանակի բռնակով հարվածել մյուս ոստիկանին։ Վերջիններս դեպքի վայրից դիմել են փախուստի։ Ստացած հրազենային վնասվածքի հետևանքով՝ Արաբկիրի պահպանության բաժնի ոստիկան, 38-ամյա Տիգրան Առաքելյանը մահացել է։ Դեպքի առթիվ քրեական գործ է հարուցվել։ Ձեռնարկվում են օպերատիվ-հետախուզական միջոցառումներ ու քննչական գործողություններ՝ կատարվածի բոլոր հանգամանքները պարզելու ուղղությամբ: