Ryanair-ի մուտքը հերթական սադրանքն է հայու գենի նկատմամբ. Տիգրան Հակոբյանի հեգնական գրառումը

Հեռուստատեսության և ռադիոյի հանձնաժողովի (ՀՌՀ) նախագահ Տիգրան Հակոբյանը ֆեյսբուքյան իր էջում հեգնական գրառում է կատարել.

«Ryanair-ի մուտքը Հայաստան հերթական հարվածն է մեր ազգային ինքնությանն ու ավանդական արժեքներին: Սա Արեւմուտքի կողմից շատ վաղուց մշակված նենգ ծրագիր է, որը կյանքի կոչվեց դավադիր իշխանության հաստատումից հետո: Այլասերված Դանիայում մասնագիտացված դասընթացներ անցած աղջնակը հատուկ նպատակներով ներդրվեց Հայաստանի քաղավիացիայի համակարգ: 

Օգտվելով ստեղծված իրավիճակից, նա լայնորեն բացեց մեր օդային դռները անտրաբանական ցածր գներով թռիչքներ իրականացնող օտար ավիաընկերության առջեւ: Եւ դա թույլ կտա մի կողմից Հայաստան սողոսկել հազարավոր եվրոանբարոյականներին, մյուս կողմից կհեշտացնի Եվրոպա մեկնելու հնարարավորությունը հատկապես երիտասարդների համար:

Ավելորդ է նկարագրել այդպիսի ճամբորդություններր, արեւմտյան կեղծ արժեհամակարգին, խորթ բարքերին ծանոթանալու եւ կրկնօրինակելու աղետալի հետեւանքները: Սա հերթական սադրանքն է հայու գենի նկատմամբ:

Ուստի, սուրբ պայքարի նոր ճակատ է բացվում հանուն մեր արժեքների: Եկել է համախմբվելու պահը:
# Ոչ օտարամոլ Ryanair-ին
# Պարտվել չկա»,- գրել է Հակոբյանը: