Ադրբեջանը չի ուզում հակամարտության խաղաղ հանգուցալուծում. Ռուբինյան

Վարչապետ Նիկոլ Փաշինյանն ակնկալում էր, որ Ադրբեջանը կընդունի Արցախի հարցի խաղաղ հանգուցալուծման փաստը: Այս մասին լրագրողների հետ զրույցում ասաց ԵԽԽՎ-ում հայկական պատվիրակության ղեկավար Ռուբեն Ռուբինյանը:

Հարցին թե, ինչ է կարծում Ալիևի հայտարարության մասին, թե «Ղարաբաղը Ադրբեջան է և վերջ և գոյություն չունի Ղարաբաղի ժողովուրդ», Ռուբեն Ռուբինյանը պատասխանեց, թե Ալիևի պատասխանն ապացուցում է, որ ի տարբերություն հայկական կողմերի, Ադրբեջանը կառուցողական դիրքորոշում չունի:

«Ադրբեջանը, ըստ էության, չի ուզում հակամարտության խաղաղ հանգուցալուծում: Ի՞նչ էր Հայաստանի վարչապետի ասածը. կա հակամարտություն և եթե այդ հակամարտությունը կարող է ունենալ միայն խաղաղ հանգուցալուծում, և եթե մենք ուզում ենք հասնել այդ հանգուցալուծմանը, ապա անհրաժեշտ է, որ և՛ Հայաստանի, և՛ Արցախի, և՛ Ադրբեջանի ժողովուրդը համաձայն լինեն դրան»,- ասաց նա և հավելեց, թե Փաշինյանն ակնկալում էր, որ մյուս կողմը ևս ընդուներ այս փաստը:

Հարցին թե, սահմանին զոհ և վիրավոր կա, արդյո՞ք սա չի խոսում այն մասին, որ խնդրի կարգավորումը, ըստ էության, տեղից չի շարժվում, և Նիկոլ Փաշինյանի առաջարկը կենսունակ չէ, Ռուբինյանը պատասխանեց.

«Սա խոսում է այն մասին, որ հակամարտության հանգուցալուծման եղած բանաձևը միակն է, որն Ադրբեջանը չի ընդունում և շարունակում է իր ռազմատենչ հայտարարությունները»,- նշեց նա: