Վերաքննիչ դատարանը մերժեց Ֆինանսների նախկին նախարար, ՊԵԿ նախկին նախագահ Գագիկ Խաչատրյանի պաշտպանների ներկայացրած՝ խափանման միջոց կալանքը փոխելու միջնորդությունը:

 Այս մասին լրագրողների հետ զրույցում ասել է  Գագիկ Խաչատրյանի փաստաբան Երեմ Սարգսյանը: 

«Այն առաջընթացը, որը կար հեղափոխությունից հետո դատական համակարգում, այն, որ դատարանները որոշակի ազատություն, անկախություն ունեին, պետք է արձանագրել, որ կործանվել է: Վերաքննիչ դատարանը միակ հույն էր մնացել, որ կարող է անկախ որոշում կայացնել: Այս պահին Ռուբիկ Մխիթարյանի նման դատավորը, որը միշտ աչքի է ընկել իր կայացրած անկախ որոշումներով, այսօր փաստացի չկարողացավ հաղթահարել այն ճնշումները, որոնք առկա են իր նկատմամբ»,- ասել է փաստաբանը:

 Երեմյանի խոսքով՝ դատարանի որոշումը դեռ չի տրվել, սակայն իր խորությամբ գործի նյութերին ծանոթ լինելով, պատկերացնում է, որ դատարանը գրելու է այնպիսի բան, որը իրավաբանության հետ կապ չի ունենալու: 

«Դատարանը պարտավոր էր հիմնավոր կասկած արձանագրել, դրանից հետո ասել, որ կալանավորման հիմքեր կան, հետո ասել, որ գրավի կիրառումը այս դեպքում թույլատրելի չէ: Ըստ էության՝ այս ամենը սպասելի էր: Ցավով եմ նշում, որ դատական համակարգն այս վիճակում է հայտնվել»,- նշել է

Սարգսյանը: 

«Օրենքով նախատեսված բոլոր քայլերը կձեռնարկենք, նաև կքննարկենք այս դատավորի հետ կապված կարգապահական հարցերը: Ես եզակի դեպքերում եմ նման քայլերի դիմում, բայց եթե այսքան ակնհայտ և կոպիտ խախտումներ են տեղի ունենում, ուղղակի պետք է արձագանքել դրան: Եթե վերաքննիչ դատարանը չկարողանա այս փաստերով որոշում կայացնել, ստիպված կլինենք խնդիրը միջազգային ատյաններում ներկայացնել»,- ասել է նա: