Բնակարանային գողության դեպքեր են բացահայտվել
Սեպտեմբերի 24-ին ոստիկանության Քանաքեռ-Զեյթունի բաժնում հաղորդում ստացվեց, որ անհայտ անձը մտել է օտարերկրացու բնակարան ու զարդատուփը գողացել, որի մեջ եղել է 10 գրամանոց ոսկե շղթա։ Բնակարանային գողության վերաբերյալ բաժնում հաղորդում ստացվեց նաև սեպտեմբերի 26-ին։ Չկողպված դռնով մտել էին ներս ու ոսկյա զարդեր հափշտակել։
Սեպտեմբերի 28-ին էլ բաժին դիմած քաղաքացին հայտնեց, որ տնից փորձել են գողություն անել։ Ոստիկանության Քանաքեռ-Զեյթունի բաժնի քրեական հետախույզները, համագործակցելով ոստիկանության Երևան քաղաքի վարչության քրեական հետախուզության բաժնի գործընկերնի հետ, պարզեցին, որ բոլոր դեպքերում գործել է նույն անձը։
Հրազդանի բնակիչ, 25-ամյա կասկածյալը սեպտեմբերի 28-ին հայտնաբերվեց ու բերման ենթարկվեց ոստիկանության Քանաքեռ-Զեյթունի բաժին։ Երիտասարդը ներկայացվեց տարածքային նախաքննական մարմնին ու տվեց խոստովանական ցուցմունք։ Գողոնը հայտնաբերելու միջոցառումները շարունակվում են։
Կատարվում է նախաքննություն։
