ՏԵՍԱՆՅՈՒԹ․ "Արևիք" ազգային պարկի հրդեհված հատվածներից թարմ տեսարաններ
«Էկո-Մեդիա» լրագրողական ցանցի համահիմնադիր, լրագրող Նարինե Կիրակոսյանը տեսանյութ է հրապարակել «Արևիկ» ազգային պարկից իր ֆեյսբուքյան էջում` նշելով, որ այս հրդեհի մեղավորները պետք է բացահայտվեն, ենթարկվեն պատասխանատվության:
«Մնացորդային կրակը գիհուտի դեպքում դեռ երկար կվառվի։ Գիհու կրակը չի մարում մինչև արմատային համակարգի վերջնական մոխրացումը, ինչն էլ վկայում է Մանուկ Մանուկյանի կողմից արված այս նկարներից առաջինը։ Սա նշանակում է, որ մեկուսացնելով կրակը, դեռ մի քանի օր պետք է հետևել, որ հրդեհը նորից չբռնկվի։ Սյունիքի մարզի Մեղրու խոշորացված համայնքի Լեհվազ և Վարդանի ձոր համայնքների մոտակայքից բռնկված, հետո «Արևիկ» ազգային պարկի տարածք անցած կրակը, տարբեր գնահատականներով, ընդգրկել է 12-44 հա տարածք։ Առաջին թիվը, նախնական վիզուալ գնահատականով, հնչեցրել է ազգային պարկի տնօրեն Գագիկ Գևորգյանը»,- մասնավորապես գրել է Կիրակոսյանը:
Ֆեյսբուքյան օգտատեր Մանուկ Մանուկյանը ևս լուսանկարներ է հրապարակել ազգային պարկի այրված գիհիներից:
