ՏԵՍԱՆՅՈՒԹ. Փնթի ասֆալտապատում, ձյութով պատված անիվներ և կոշիկներ

Այսօր Ռադիո Ավրորայի խմբագրություն բազմաթիվ բողոքներ են ստացվել, նաև ուղարկվել տեսանյութ Երևանի տարբեր փողոցներում իրականացվող ասֆալտապատման աշխատանքների վերաբերյալ: 

Չնայած այն հանգամանքին, որ ասֆալտապատման աշխատանքների իրականացումը ուրախացնում է մեր համաքաղաքացիներին, սակայն դրա հետ մեկտեղ բազմաթիվ անհարմարություններ է ստեղծում ինչպես վարորդների, այնպես էլ հետիոտնի համար: 

Բանն այն է, որ այդ աշխատանքները, մեզ դիմողների խոսքով, կատարվում են բավականին փնթի և չհամակարգված ձևով. ճանապարհներին փորվածքներ են արվում, հաջորդ փուլով  լցվում է ձյութը, որից հետո պետք է իրականացվեն փոսալցման և ասֆալտապատման աշխատանքները, սակայն փորվածքները ձյութով պատելուց հետո ոչ միայն անմիջապես չի իրականացվում ասֆալտապատում, այլև փնթի աշխատանքի և մեքենաների հոսքի պատճառով ձյութը տարածվում է ամբողջ փողոցով, ինչից հետո կպչում է մեքենաների անիվներին և մարդկանց կոշիկներին: 

Ինչևէ, խնդրի հետ կապված մենք կապ հաստատեցինք քաղաքապետարանի մամուլի խոսնակ Հակոբ Կարապետյանի հետ, ով համաձայնեց, որ նման պարագայում, բնականաբար, քաղաքացիներին անհարմարություններ պատճառվում են, և խոստացավ այս դժգոհությունները Շինբարեկարգման վարչության միջոցով հայտնել ասֆալտապատում իրականացնող ընկերություններին:

Տեսակադրերում երևում են Էրեբունի վարչական շրջանում իրականացված աշխատանքները, սակայն նույն պատկերին ականատես ենք լինում նաև քաղաքի այլ հատվածներում: