Ինչ վերաբերում է անվտանգությանը, ապա տարածաշրջանում կարող են խաղաղապահ ուժեր տեղակայվել. Մամեդյարով

«Վաշինգտոնում կայացած բանակցությունների ընթացքում Մինսկի խմբի համանախագահները կրկին ներկայացրել են նախկինում քննարկված փաստաթղթերը», - այս մասին հայտնել է Ադրբեջանի արտաքին քաղաքական գերատեսչության ղեկավար Էլմար Մամեդյարովը` մեկնաբանելով  Հայաստանի արտգործնախարար Զոհրաբ Մնացականյանի հետ հունիսի 20-ին կայացած հանդիպումը:

Ինչպես հաղորդում է Turan գործակալությունը` Ադրբեջանի արտգործնախարարը հայտնել է, որ իրենք այժմ աշխատում են համանախագահների` մարտի 9-ին հրապարակած հայտարարության հիման վրա: Նա ընդգծել է, որ փաստաթուղթը պետք է լրջորեն ուսումնասիրվի, իսկ կողմերը պայմանավորվել են, որ համանախագահները նախարարներին նոր հանդիպում կառաջարկեն 2-ից 3 ամիս անց:

 «Անպայման չէ շփման գծում վերականգնել անդորրը և նոր բանակցություններ վարել: Մենք պետք է բովանդակային բանակցություններ վարենք: Այժմ մենք աշխատում ենք համանախագահների` մարտի 9-ին հրապարակած հայտարարության հիման վրա: Այդ փաստաթղթի որոշ դրույթների հետ մենք համաձայն ենք, որոշ դրույթների հետ` ոչ», - նշել է Մամեդյարովը`պնդելով, որ այդ հայտարարության համաձայն հայկական զորքերը պետք է դուրս բերվեն ադրբեջանական տարածքներից, իսկ մնացածը կարելի կլինի որոշել դրանից հետո:

«Հայկական կողմը ամեն անգամ շրջանառում է անվտանգության և Լեռնային Ղարաբաղի կարգավիճակի մասին հարցերը: Ինչ վերաբերում է անվտանգությանը, ապա տարածաշրջանում կարող են խաղաղապահ ուժեր տեղակայվել: Համանախագահները այդ ուղղությամբ պետք է աշխատանքներ տանեն», - հայտարարել է Ադրբեջանի ԱԳՆ ղեկավարը: