Խարկովի ֆիզիկական կուլտուրայի պետական ակադեմիայի առաջին կուրսի ուսանող Արթուր Մարտիրոսյանը ուսանողական հանրակացարանում տեղի ունեցած միջադեպից հետո հայտնվել է հիվանդանոցում: Այս մասին տեղեկանում ենք Shantnews.am-ի: 

18-ամյա Արթուրը, որ զբաղվում է ըմբշամարտով, հանրակացարանում ընկերացել է մի ադրբեջանցու հետ, որը հրավիրել է նրան երեկույթի:  Այդտեղ եղել են նաև այլ ադրբեջանցիներ: Երեկույթի ընթացքում Արթուրը վատ է զգացել և վերադարձել է իր սենյակ: Քիչ հետո նրա մոտ են եկել ադրբեջանցիները, իբր հետաքրքրվելու նրա առողջական վիճակով:

Արթուրը նկատել է, որ ադրբեջանցիներն ինչ-որ պայուսակ են թողել իր մոտ և անձնագրեր ու գլխի է ընկել, որ այդ պայուսակի մեջ թմրանյութ կա: Նա ենթադրել է, որ այդպիսով փորձել են իր վրա «գործ սարքել», սակայն ցույց չի տվել, որ հասկացել է դա:

Նա սպասել է մինչև ադրբեջանցիների գնալը, ապա պատուհանից դուրս է նետել պայուսակն ու անձնագրերը: Ադրբեջանցիները դա տեսել են, հետ են վերադարձել, կոտրել են դուռը և ծեծի են ենթարկել Արթուրին: Արթուրը հասել է մինչև պատուհան և օգնություն է կանչել: Այդ ժամանակ էլ ադրբեջանցիները նրան դուրս են նետել պատուհանից: «ХарківTimes» լրատվականին այս մասին պատմել է Արթուրի հայրը` Սերգոն:

Արթուրը հրաշքով է ողջ մնացել: Նա սողալով հասել է մինչև ավտոկայանատեղի: Պահակը նկատել է դա և չի թողել որ տարածք մուտք գործեն նաև ադրբեջանցիները: Նա ոստիկանություն է կանչել: Արթուրը շտապօգնության մեքենայով տեղափոխվել է հիվանդանոց: Նրա մոտ ախտորոշվել է կոնքոսկերի և ազդոսկրի կոտրվածք, կոնքոսկրերի տեղաշարժ: