Կառավարությունն առաջարկում է նվազեցնել գազի սակագինը, իսկ «Գազպրոմը»ՙ ավելացնել
Կառավարության, Հանրային ծառայությունները կարգավորող հանձնաժողովի և «Գազպրոմի» միջև բանակցություններն այս պահին ավարտական փուլում չեն. այս մասին Tert.am-ի գրավոր հարցմանն ի պատասխան հայտնել են փոխվարչապետ Մհեր Գրիգորյանի գրասենյակից:
«Բանակցություններն ընթանում են Կառավարության և Հանրային ծառայությունները կարգավորող հանձնաժողովի կողմից սակագնի նվազեցման, իսկ «Գազպրոմի» կողմից՝ ավելացման մոտեցումների շուրջ: Այնուամենայնիվ, երկու կողմն էլ ձգտում են հավասարակշռել հիմնականում սպառողների շահը, անվտանգ սպասարկման և շահագործման նպատակով անհրաժեշտ նվազագույն ներդրումների և ողջամիտ եկամտաբերության սկզբունքները»,- ասված է փոխվարչապետի գրասենյակի պատասխանում:
Tert.am հարցին ի պատասխան, թե արդյոք գազի սակագնի փոփոխություն սպասվում է, նշել են՝ գազի սակագնի փոփոխությունների վերաբերյալ հարցին հնարավոր կլինի պատասխանել բանակցությունների արդյունքներն ամփոփելուց հետո:
Ավելի վաղ «Գազպրոմ Արմենիայի» հասարակայնության և ԶԼՄ-ների հետ կապերի ծառայությունից Tert.am-ին հայտնել էին, որ իրենց տեղեկություններով գազի սակագնի շուրջ բանակցություններն ավարտական փուլում են, և առաջիկայում «Գազպրոմ Արմենիան» կհայտնի իր դիրքորոշումը հարցի հետ կապված:
2019-ի հունվարի 1-ից ռուսական կողմը բարձրացրել է Հայաստան մատակարարվող գազի գինը՝ 150 ԱՄՆ դոլարից դարձնելով 165 ԱՄՆ դոլար, սակայն ՀՀ կառավարությունը հայտարարել էր, որ սպառողները դրա դիմաց կվճարեն նախկին գնով։
Հունվարի 8-ից մեկնարկել էին բանակցությունները Կառավարության և «Գազպրոմի» միջև:
