«Մեդուզա»-ի լրագրող Իվան Գոլունովի գործը կարճվել է

«Մեդուզա»-ի լրագրող Իվան Գոլունովի գործը, որին շաբաթ օրը դատարանն ուղարկեց տնային կալանքի՝ մեծաքանակ թմրանյութի իրացման եւ վաճառքի մեղադրանքով, արդեն փակված է: Նա ազատված է մեղադրանքը ոչ ապացուցված լինելու հիմնավորմամբ: Գոլունովի նկատմամբ քրեական գործի դադարեցման մասին հայտնել են ռուսական 3 խոշորագույն լրատվական գործակալությունները՝ երկրի ներքին գործերի նախարար Վլադիմիր Կոլոկոլցեվին հղումով: Նա հայտնել է նաեւ, որ լրագրողի վրայից հանվել են բոլոր մեղադրանքները եւ արդեն այսօր՝ երեքշաբթի, նա կազատվի տնային կալանքից: Իվան Գոլունովը, որը հայտնի է որպես Ռուսաստանում կոռուպցիոն գործերի բացահայտմամբ զբաղվող հետաքննող լրագրող, ձերբակալվել էր հունիսի 6-ին, սակայն նա հերքում էր իրեն առաջադրված մեղադրանքը: Նշենք, որ Գոլունովի պաշտպանության համար ռուսական առաջատար լրատվամիջոցները՝ ամսագրերի, թերթերի ու կայքերի դիմաշապիկին վերջինիս անունն ու նրա ազատ արձակման կոչն էին տպագրել՝ տեղի ունեցածը խայտառակություն որակելով: Գործից տեղյակ էին եւ այն մեկնաբանել էին անգամ նախագահական նստավայրում: