Գիշատիչ հովազի հետ խաղացող երեխան «Ջամբո»-ի տիրոջ աղջիկն է
EcoNews բնապահպանական տեղեկատվական կայքի գլխավոր խմբագիր Մարիամ Թաշչյանը լուսանկարներ է հրապարակել, որոնցում երևում է, թե ինչպես է մանկահասակ երեխան խաղում վայրի հովազի հետ:
SHANTNEWS.am-ը գնացել է լուսանկարի հետքերով: «Ջամբո» էկզոտիկ պարկի սեփականատեր Արտյոմ Վարդանյանը լրատվականի հետ զրույցում հաստատել է, որ լուսանկարի փոքրիկն իր աղջիկն է: Ավելին, Վարդանյանը կենդանիների նկատմամբ ամենևին բռնություն չի տեսնում այն լուսանկարներում, որոնք հրապարակել էր Մարիամ Թաշչյանը:
Հիշեցնենք, որ հրապարակման մեկնաբանություններում Արտյոմ Վարդանյանը հեղինակին մեղադրել է Կենդանաբանական այգու տնօրեն Ռուբեն Խաչատրյանի կողմնակիցը լինելու և սուտ տեղեկություններ տարածելու մեջ։ Բանավեճ էր սկսվել Արտյոմ Վարդանյանի և Ռուբեն Խաչատրյանի կողմնակիցների միջև։ Կողմերն իրար մեղադրում են այս կամ այն մարդու պատվերը կատարելու մեջ։
