Շաբաթօրյակ Եռաբլուրում
Պաշտպանության նախարարությունն այսօր շաբաթօրյակ է կազմակերպել Եռաբլուրում։ Այս մասին տեղեկանում ենք Պաշտպանության նախարարի մամուլի խոսնակ Արծրուն Հովհաննիսյանի ֆեյսբուքյան «լայվից», լվացվում են տապանաքարեր, ջրվում մերձակայքի՝ դեռևս չչորացած բուսականությունը։
Լրագրությունը մասնագիտություն է, որը երբեմն և ցավոք, սահմանակցում է կեղծիքի, իրերի ու երևույթների միտումնավոր խեղաթյուրման և այլ, ոչ այնքան ազնիվ դրսևորումների հետ: Բայց նույնիսկ այդ պարագայում ՊԵ´ՏՔ Է լինեն մասնագիտական և բարոյական որոշակի սահմաններ: «Հրապարակ» օրաթերթի լրագրողը երեկ այցելել է «Եռաբլուր» զինվորական պանթեոն և «հայտնաբերել», որ մեր գոյամարտի ընթացքում հերոսացած քաջերի վերջին հանգրվանը հանդիսացող բարձունքի տարածքը խնամված չէ, խոտածածկը չորացած է, իսկ ԴՐՈՇԸ` «ԲԶԿՏՎԱԾ»: «Եռաբլուր» զինվորական պանթեոնում ԵՐԲԵՔ այս տիպի դրոշ չի եղել (տես լուսանկարները): Լրատվամիջոցի հրապարակած լուսանկարի նույնիսկ դրոշի սյունն է ակնհայտորեն ուրիշ: Այսինքն` առավել քան ակնհայտ է, որ գործ ունենք կեղծիքի հետ, որը, ցավոք, առնչվում է սրբատեղի համարվող պանթեոնի հետ: «Եռաբլուրի» տարածքը մշտապես խնամված է: Հենց հիմա էլ ՊՆ և ԶՈւ ներկայացուցիչներն այստեղ են` շաբաթօրյակի շրջանակում:
Համոզիչ խնդրանք կեղծիք տարածողներին. հեռու մնացեք «Եռաբլուրից»: Այստեղ հանգչող հերոսները նաև ՁԵԶ համար են իրենց կյանքը զոհաբերել:
Այս մասին գրել է ՀՀ ՊՆ տեղեկատվության և հասարակայնության հետ կապերի վարչության պետ Գևորգ Ալթունյանը:
Հիշեցնենք, որ Hraparak.am-ն անդրադարձել էր, թե Եռաբլուրում ջուր չկա, բուսականությունը չորացած է, իսկ հայոց Եռագույնն էլ՝ անխնամ, գունաթափված:
