Ուջանում իրավիճակը լարված է. բողոքի ակցիա է իրականացնում շուրջ 19 ընկերություն
Ինչպես արդեն հայտնել ենք, շինարարական ենթակապալառու ընկերությունները փակել են Հյուսիս-հարավի ճանապարհային միջանցքի Աշտարակ-Ուջան հատվածը: Կատարված աշխատանքի դիմաց նրանց մոտ 10 ամիս գումար չի վճարվել։
Shantnews am-ի հաղորդմամբ` գյուղացիների մի մասը և ոստիկանները հորդորում են բացել ճանապարհը, սակայն բողոքող քաղաքացիներն ասում են, որ շատ նյութական վնասներ են կրել և պահանջում են հատուցում:
Շուրջ 19 ընկերության ներկայացուցիչներ բողոքում են, որ սեպտեմբեր ամսվանից աշխատավարձ չեն ստացել, իսկ կառավարությունից նշում են, որ դժգոհ են եղել իրենց աշխատանքից:
Ակցիայի մասնակիցներից մեկը նշեց, որ դիմել են ԾԻԳ, Տրանսպորտի նախարարություն, սակայն ոչ մի արձագանք չեն ստացել.
«Բոլոր ընկերությունների մասով պարտքը կազմում է 2,5 միլիարդ դրամ, բոլոր շինարարական կազմակերպությունները բարեխիղճ կատարել են իրենց աշխատանքը: Շուրջ 700 ընտանիք մնացել է անգործ: Մարդիկ էդ ծրագրով ապրում էին, մեզ ոչ ոք չի աջակցել և չի աջակցում»,- նշեց ակցիայի մասնակիցներից մեկը:
Այս պահին բացվել է ճանապարհի մի մասը: Ակցիայի մասնակիցները սպասում են կառավարության ներակայացուցիչներին:
Տեղեկություն կա, որ այստեղ կարող է ժամանել տրանսպորտի փոխնախարարը:
