Ինձ կներգրավեն «սև ցուցակում», և ի՞նչ. Պոզները` Արցախ այցելելու մասին

Հայտնի լրագրող և հեռուստահաղորդավար Վլադիմիր Պոզները ցավում է, որ վերջերս Հայաստան կատարած այցի ժամանակ չի կարողացել մեկնել Լեռնային Ղարաբաղ: Այս թեմայի շուրջ նա խոսել է Հայաստանի Հանրային հեռուստաընկերությանը տված հարցազրույցում: Պոզները նշել է, որ մեծ համակրանքով է վերաբերվում Հայաստանին, և հայերին համարում է շատ խելացի ազգ: Նա ընդգծել է, որ իրեն գրավում է բարդ պայմաններում ապրելու և գոյատևելու հայերի բացառիկ կարողությունը։ Պոզներին դուր է գալիս նաև հայերի՝ կյանքից ուրախանալու անկախ ամեն ինչից ունակությունը: «Ցավոք, ես չեմ եղել Լեռնային Ղարաբաղում։ Հաճույքով կգնայի, բայց չհասցրեցի։ Ես կգնայի իմ դիրքորոշումը հայտնելու, որ բոլորը, այդ թվում ՝ պարոնայք ադրբեջանցիները, հասկանան, որ սիրտս այդ կողմում է, այլ ոչ թե՝ այն»: Ընդ որում Պոզները հայտարարել է, որ իրեն չի հուզում Բաքվի «սև ցուցակը», ընդհակառակը, այն միայն ժպիտ է առաջացնում իր մոտ: «Դե ինձ կներգրավեն «սև ցուցակում», և ի՞նչ: Կարծում եմ ՝ ես կշարունակեմ գիշերը հանգիստ քնել», – ընդգծել է լրագրողը: Պոզները նաեւ կիսվել է Հայաստանի վարչապետ Նիկոլ Փաշինյանի հետ շփումից ստացած տպավորություններով: Նրա խոսքով ՝ կառավարության ղեկավարի համար շատ կարեւոր է, եթե ոչ ամենակարեւորը, լրագրողի մասնագիտությունը։ «Ես նույնիսկ մտածում էի նրան ասել, որ չի կարելի միաժամանակ և լրագրող լինել, և վարչապետ: Նա շատ հասարակ մարդ է շփման մեջ, և նրա հետ հաճելի է զրուցել: Փաշինյանն ունի լսելու ունակություն, դա հազվադեպ է պատահում նման կարգավիճակով մարդկանց մոտ ։ Նիկոլ Փաշինյանը խելացի մարդ է», - ասել է Պոզները: