Հիմա Հրայր Թովմասյանը հնարավորություն ունի ապացուցելու, թե որքանով է ինքը կապված նախկին իշխանության հետ, որքանով՝ ՀՀ օրենքի հետ: Այս մասին, այսօր՝ մայիսի 28-ին Սարդարապատի հուշահամալիրում լրագրողների հետ զրույցում նշեց ԱԺ փոխնախագահ Ալեն Սիմոնյանը: «Հիմա կտեսնենք իր գործունեությունը: Կտեսնենք, թե ինչ որոշում կկայացնի, որովհետեւ իշխանության կրողը ՀՀ ժողովուրդն է: Եթե որոշում է կայացվում, որը ՀՀ ժողովրդի առնվազն մեծ մասին ջղայնացնում է, դուրս է հանում փողոց, նշանակում է, որ այնուամենայնիվ դատական համակարգը չի սպասարկում ՀՀ ժողովրդին»,-ասաց նա: Ալեն Սիմոնյանը նկատեց, որ ամբողջ դատական համակարգը ստեղծվել է նախկին իշխանությանը սպասարկելու համար. «Դուք լրագրողներդ բազմաթիվ անգամ խոսել եք քաղբանտարկյալների մասին, եղել է, որ լրագրողների նկատմամբ է բռնություն եղել: Դատական համակարգը, որ անպատիժ դա արել է, այսօր ընտրված իշխանության մոտ խնդիրներ է առաջացնում եւ իշխանությունը փորձում է այդ համակարգը նույնպես ուղղել: Ժողովուրդը ճիշտ է ասում, երբ ասում է՝ դուք չեք զանգում դատավորներին, ուրիշներն են զանգում: Չի լինելու էլ այդպես: Ոչ մենք ենք զանգելու, ոչ էլ թույլ է տրվելու որեւէ մեկին զանգել»,-ասաց ԱԺ փոխնախագահը: