Աննա Հակոբյանը` նախկին իշխանությունների ներկայացուցիչների նվիրաբերությունների մասին
Ի վերջո պետք է ազատվենք նախկինում տեղի ունեցած երևույթները ներկա իշխանությունների և ներկա հարաբերությունների վրա պրոյեկտելու ցանկությունից կամ սովորությունից: Այս մասին ասել է վարչապետի տիկին Աննա Հակոբյանը:
«Ուզում եմ դա խորհուրդ տալ մի պատճառով՝ դրանով կխնայենք մեր ժամանակն ու ռեսուրսը, որովհետև համարում եմ կատարյալ անիմաստ զբաղմունք: Հիմա ես այդ մասին այս ասուլիսում 5 րոպե կխոսեմ, դա ես համարում եմ անտեղի կորսված ժամանակ, դուք ձեր լրատվամիջոցի էջերում անընդհատ կգրեք այդ մասին որևէ հոդված: Ես դա անտեղի ռեսուրսի վատնում եմ համարում:
Չկա այդպիսի բան ու չի կարող լինել: Մեր երկու հիմնադրամներին նվիրատվություն անել կարող են բոլորը: Նույն տրամաբանությամբ կարող եմ ասել, որ նախկինում ոչ բոլորն են կարողացել նվիրատվություն անել վարչապետի տիկնոջ հիմանդրամում: Երբեմն մեր հանդիպումների ժամանակ մարդիկ շատ հեռվից են մոտնում, նույնիսկ միջնորդների միջոցով են մոտենում, հարցնում՝ կարո՞ղ են անել նվիրատվություն, թե՞ չէ: Մենք չունենք նման որևէ բարդույթ ո՛չ նախկին, ո՛չ ներկա, ո՛չ ապագա մարդկանց հետ», – ասել է ՀՀ վարչապետի տիկին Աննա Հակոբյանը:
Նա խորհուրդ է տվել չշահարկել այն փաստը, որ «Իմ քայլը» և «City of smile» բարեգործական հիմնադրամներին նվիրատվություն են կատարել նաև այն անձինք, որոնց կողմից նախկինում իշխանություններին պատկանող հիմնադրամներին նվիրատվություն կատարելը վարչապետ Նիկոլ Փաշինյանն ընդդիմադիր գործիչ եղած ժամանակ որակում էր որպես օլիգարխների կողմից իշխանություններին հաճոյանալու և արտոնություններ ստանալու փորձ:
