Armtimes com-ի տեղեկություններով` Երեւան քաղաքի ընդհանուր իրավասության դատարանի դատավոր Դավիթ Գրիգորյանը Ռոբերտ Քոչարյանի կալանավորումը անձնական երաշխավորությամբ փոխելուց հետո ոստիկանների ուղեկցությամբ է շրջում: ՀՀ ոստիկանությունից լրատվամիջոցի հարցին ի պատասխան ասացին, որ Դատական դեպարտամենից ստացված գրության հիման վրա ոստիկանությունը ապահովում է Դավիթ Գրիգորյանի անվտանգությունը օրենքով սահմանված կարգով: Լրատվամիջոցի հարցին՝ դատավո՞րն էր դիմել Դատական դեպարտամենտին, թե՞ դեպարտամենտը սեփական նախաձեռնությամբ է դիմել ոստիկանություն, Բարձրագույն դատական խորհրդի մամուլի եւ հասարակայնության հետ կապերի վարչությունից չպատասխանեցին: Հիշեցնենք, որ մայիսի 18-ին Դավիթ Գրիգորյանի կայացրած որոշմամբ՝ Ռոբերտ Քոչարյանի կալանքը փոփոխվեց Արցախի գործող եւ նախկին նախագահներ Բակո Սահակյանի եւ Արկադի Ղուկասյանի անձնական երաշխավորությամբ: Երկու օր անց՝ մայիսի 20-ին, Գրիգորյանը որոշեց սույն գործի վարույթը կասեցնել եւ գործը ուղարկել Սահմանադրական դատարան՝ Քոչարյանին եւ մյուսներին առաջադրված ՀՀ ՔՕ 300.1 հոդվածի՝ (սահմանադրական կարգը տապալելը) սահմանադրականության հարցը պարզելու հիմքով: