Ինձ չեն քաշքշել, ոչ էլ հայհոյանքներ են հնչեցրել: Անդրադառնալով Կասկադում երեկ իր հետ տեղի ունեցած միջադեպին՝ Tert. am-ի հետ զրույցում ասաց երգիչ, Երևանի ավագանու «Իմ քայլը» խմբակցության անդամ Արթուր Իսպիրյանը։ «Իմ երեխաների հետ նստած էի, իրենք մոտեցան և ասացին՝ «բախտդ բերեց՝ էսօր էրեխեքի հետ ես»: Նման արտահայտություն թույլ տվեցին: Միայն դա չէր, մի քանի նմանատիպ արտահայտություններ արեցին»,- հայտնեց նա: Հարցին՝ ովքե՞ր են եղել իր վրա հարձակվողները, Արթուր Իսպիրյանն ասաց՝ այնտեղ տեսախցիկները նկարել են, բոլորն էլ գիտեն՝ ով է. «Արթուր է անունը, ես ազգանունը չգիտեմ։ Իրենց բոլորն էլ ճանաչում են»։ Ավագանու անդամը միջադեպի վերաբերյալ բացատրություն է տվել ոստիկանությունում: Հիշեցնենք, որ զանգվածային լրատվության միջոցներում տեղեկատվություն էր տարածվել, թե մի խումբ անձինք «Կասկադ»-ի տարածքում մոտեցել են երգիչ, Երևանի ավագանու «Իմ քայլը» խմբակցության անդամ Արթուր Իսպիրյանին, քաշքշել, հայհոյանքներ հնչեցրել նրա հասցեին: Ոստիկանությունից տեղեկացրել էին նաև, որ ճշտվել է Արթուր Իսպիրյանի հետ տեղի ունեցած միջադեպի մասնակիցների ինքնությունը: