Շոումեն Վլադիմիր Զելենսկին, որն ապրիլի 21-ին կայացած նախագահական ընտրությունների երկրորդ փուլում ստացել էր ձայների մեծամասնությունը, Գերագույն ռադայում կայացած երդմնակալության արարողության ժամանակ պաշտոնապես ստանձնել է երկրի նախագահի պաշտոնը: Այս մասին հայտնում է Gazeta. ru-ն: Երիտասարդ ղեկավարը պարտավորվել է պաշտպանել երկրի ինքնիշխանությունը, անկախությունը, աշխատել Ուկրաինայի և ժողովրդի բարօրության համար, պաշտպանել քաղաքացիների իրավունքներն ու ազատությունները, հետևել երկրի սահմանադրությանը, ամբողջ աշխարհում բարձրացնել երկրի հեղինակությունը: Այնուհետև Զելենսկիին են հանձնել պետության ղեկավարի պաշտոնական խորհրդանիշները: Նշենք, որ Ուկրաինայի նախագահը ոտքով էր եկել իր երդմնակալության արարողությանը, որը տեղի ունեցավ Գերագույն ռադայի շենքում: Կիևի քաղաքապետ Վիտալի Կլիչկոն նախընտրել էր էլեգանտ կոստյում հագնել ու հեծանվով գալ: