«Առաջին օրերին, երբ եկա ու սկսեցի աշխատել, իմ առաջին հանձնարարականներից էր, որ Երևանի բոլոր անցումները լուսավորվեն»,- այս մասին այսօր լրագրողների հետ ճեպազրույցում ասաց Երևանի քաղաքապետ Հայկ Մարությանը՝ անդրադառնալով այն խնդրին, որ Մաշտոցի պողոտայի երկու գետնանցումները բավականին վատ վիճակում են, նաև լուսավորություն չկա: «Մենք Երևանի բոլոր անցումները լուսավորել ենք, և ես ինքս գնացել, ստուգել եմ, բոլորը լուսավորված են եղել, բայց մեկ շաբաթ անց այդ լույսերը կամ կոտրել են, կամ գողացել: Ես ուզում եմ նշել, որ քաղաքապետարանը և ոստիկանությունն ի զորու չեն բոլոր անցումներում հերթապահություն իրականացնել և հետևել, որ մեր բնակիչները չկոտրեն կամ չգողանան»,- նշեց Մարությանը: Քաղաքապետի խոսքով՝ մասնավորապես նշված երկու անցումներում բարեկարգման աշխատանքներ սկսելու համար խնդիրներ կան, որովհետև դրանք վաճառված են. «Քանի որ այդ երկու անցումները վաճառված են և սեփականատեր ունեն, ով խախտում էր պայմանագիրը, մենք պարտադրել ենք, որպեսզի սեփականատերը սկսի աշխատանքները: Ամեն ինչ անելու ենք, որպեսզի իրենք մաքսիմալ արագ աշխատեն, այլապես կենթարկվեն տուգանքների ու տույժերի»: Այս անցումների հետ կապված մեկ այլ խնդիր էլ կա, դրանք ամբողջությամբ վերանորոգելու համար պետք է փակվեն, ինչն էլ իր հերթին նոր անհարմարություն կառաջացնի բնակիչների համար: Ինչ վերաբերում է մյուս անցումներին, որտեղ տարբեր խախտումներով մարդիկ իրենց բիզնեսն են դրել, քաղաքապետն ասաց. «Մի կողմից հանրությունը պահանջում է, որ մենք մաքրենք այդ տարածքները, մյուս կողմից էլ պահանջում են, որ ձեռք չտանք, որովհետև դրանք աշխատատեղեր են»: