ԵԱՏՄ անդամ երկրների ղեկավարների ու նրանց ընտանիքի անդամների ուղեբեռը չի ստուգվի. Նախագիծ
ՀՀ կառավարության՝ մայիսի 10-ի նիստի օրակարգում, ի թիվս այլ հարցերի, նաև «2017 թ. ապրիլի 11-ի ԵԱՏՄ Մաքսային օրենսգրքում փոփոխություններ կատարելու մասին» արձանագրության ստորագրման առաջարկությանը հավանություն տալու հարցն է:
Արձանագրության նախագծին հավանություն է տրվել Եվրասիական տնտեսական խորհրդի 2018թ. դեկտեմբերի 5-ի թիվ 40 կարգադրությամբ և ներկայացվել է Եվրասիական տնտեսական միության անդամ պետություններին՝ ներպետական համաձայնեցման ընթացակարգերն ապահովելու համար:
Արձանագրությամբ նախատեսվում է փոփոխություններ կատարել Եվրասիական տնտեսական միության Մաքսային օրենսգրքի 321-րդ հոդվածում, որով սահմանված են մաքսային մարմինների կողմից մաքսային հսկողության որոշակի ձևերի կիրառումից ազատելու դրույթները: Մասնավորապես, նախատեսվում է ԵԱՏՄ անդամ պետությունների ղեկավարների և նրանց ուղեկցող ընտանիքի անդամների անձնական ուղեբեռի մաքսային զննումից հավասարապես ազատել նաև ԵԱՏՄ անդամ պետությունների կառավարությունների ղեկավարների և նրանց ուղեկցող ընտանիքի անդամների անձնական ուղեբեռը:
Նախագծով նախատեսվում է նաև լրացնել վերը նշված հոդվածով սահմանված Հայաստանի Հանրապետության այն պաշտոնատար անձանց ցանկը, որոնց անձնական ուղեբեռը ևս ենթակա չէ մաքսային զննության:
Ելնելով վերոգրյալից՝ կառավարությունը այս արձանագրության ստորագրումը նպատակահարմար է գտնում:
