ԱՄՆ քաղաքացիական ավիացիայի վարչությունը Վենեսուելայում տիրող «քաղաքական անկայունության և լարվածության» պատճառով արգելել է ամերիկյան ավիաընկերություններին թռիչքներ իրականացնել այդ երկրի օդային տարածքում և կարգադրել է լքել Վենեսուելան 48 ժամվա ընթացքում: Այս մասին հայտնում են տեղի լրատվամիջոցները: Նշվում է, որ զգուշացումը վերաբերում է Միացյալ Նահանգներում գրանցված բոլոր ավիափոխադրող ընկերություններին: Հիշեցնենք, որ ապրիլի 30-ին Վենեսուելայի ընդդիմության առաջնորդ Խուան Գուաիդոն, որն իրեն երկրի նախագահի ժամանակավոր պաշտոնակատար է հռչակել, իր կողմնակիցների հետ հավաքվել է մայրաքաղաքի «Կառլոտա» ռազմաբազայի մոտ գտնվող մայրուղում: Վենեսուելայի դատախազությունը պետական հեղաշրջում իրականացնելու փորձի առնչությամբ հետաքննություն է սկսել: Կան տասնյակ տուժածներ: