ՏԵՍԱՆՅՈՒԹ․ Ի՞նչ է տեղի ունեցել Վայքում պաշտոնյաների մասնակցությամբ. Armdaily. am
Մի քանի օր է՝ լրատվամիջոցների ուշադրության կենտրոնում է Վայքում Քաղաքացու օրը մարզպետի, պատգամավորի եւ համայնքապետի մասնակցությամբ տեղի ունեցած միջադեպը։
Ըստ մամուլի հրապարակումների՝ Վայոց ձորում ԲՀԿ-ական Սերգեյ Բագրատյանի եւ փոխմարզպետ Ռազմիկ Տոնոյանի միջեւ ընդհարումը սկսվել է «բիչոկից», որը Քաղաքացու օրվա միջոցառման մասնակից երիտասարդներից մեկը գետնին է նետել, իսկ երիտասարդ փոխմարզպետն էլ ցուցադրաբար հորդորել է նրան առվի միջից վերցնել «բիչոկը»՝ խոցելով տղայի ինքնասիրությունը։ «Հրապարակի» փոխանցամբ՝ վերջինս անցել է հակագրոհի․ «Քեզ պետք է՝ դու վերցրու»: Դա լեզվակռվի պատճառ է դարձել, որին միացել են մյուսները, այդ թվում՝ Բագրատյանը։ Պատգամավորը հանդիմանել է փոխմարզպետին․ «Ի՞նչ տոնով ես խոսում, քեզ ո՞վ ա իրավունք տվել ջահել տղուն նվաստացնես»։ Փոխմարզպետը դիտողությունը ծանր է տարել։
Armdaily. am-ի տրամադրության տակ է մի տեսանյութ, որը ուղիղ եթերով տեսագրել է այնտեղ գտնվող քաղաքացիներից մեկը: Տեսանյութի սկզբում երևում է, որ երկրորդ պլանում քաշքշուկ է: Փոխմարզպետը, ով արևային ակնոցով և կապույտ պիջակով է, ինչ-որ երիտասարդի հետ կոնֆլիկտի մեջ է, մյուսները բաժանում են կռվողներին։ Այստեղից տեսագրությունը ընդհատվում է։ Տեսանյութի երկրորդ հատվածում արդեն երեւում է, որ ամեն ինչ հարթվել է, մասնակիցները նորմալ շփվում են միմյանց հետ, մասնավորապես՝ պատգամավոր Սերգեյ Բագրատյանը մարզպետի հետ ջերմ զրուցում է, լսվում է, թե ինչպես են փոխմարզպետ Ռազմիկ Տոնոյանին կանչում միանալու իրենց:
Մանրամասները տեսանյութում:
