Երեւանի ավագանու այսօրվա նիստում ընդմիջումից հետո քվորում չկար: Քաղաքապետ Հայկ Մարությանը հայտարարեց, որ քանի որ չկա քվորում, կես ժամից եւս մեկ անգամ կփորձեն շարունակել ավագանու նիստը: Այս առնչությամբ, ավագանու «Լույս» խմբակցության ղեկավար Դավիթ Խաժակյանը Facebook-ի իր էջում գրել է. «57 հոգանոց մեծամասնությունը հարկ չհամարեց գոնե ներկայություն ապահովել: Սա պարզապես խայտառակություն է. նիստը չի կայանում քվորում չունենալու պատճառով»: Ավելի ուշ հնարավոր եղավ քվորում ապահովել եւ նիստը շարունակվեց: Հիշեցնենք, որ ավագանու օրակարգում ի սկզբանե 16 հարց կար, քննարկվելու էր «Երեւանի աղբահանություն եւ սանիտարական մաքրում» համայնքային հիմնարկ ստեղծելու եւ դրա կանոնադրությունը հաստատելու մասին հարցը: