ԱԺ–ն այսօր առաջին ընթերցմամբ ընդունեց ԱԺ փոխնախագահներ Լենա Նազարյանի և Ալեն Սիմոնյանի հեղինակած «2008 թվականի մարտի 1-ից 2-ը Երևան քաղաքում տեղի ունեցած իրադարձությունների ժամանակ տուժած անձանց աջակցության մասին» օրենքի նախագիծը: Դրանով առաջարկվում է աջակցություն տրամադրել 2018թ-ի մարտի 1-2-ի գործողությունների ժամանակ վնասվածք ստացած և զոհված անձանց ու նրանց ընտանիքներին: Նախագծի հեղինակների համոզմամբ` նախկին իշխանության օրոք ոչ բոլոր տուժածներն են ընկալվել որպես տուժած: «Բարգավաճ Հայաստան» խմբակցության ղեկավար Վահե Էնֆիաջյանը հայտարարեց, որ խմբակցությունը նույնպես կողմ կքվեարկի նախագծին: Նշենք, որ նախօրեին ՊՀԿ խմբակցության պատգամավոր մանե Թանդիլյանը կարևորել էր նախագիծը, սակայն մատնանշել էր հստակ ժամկետների բացակայությունը` հորդորելով հստակեցնել, թե ինչ ժամանակահատվածում է նախատեսվում իրականացնել աջակցությունը: Նախագիծն ընդունվեց միաձայն` առանց դեմ ու ձեռնպահ ձայների: Օրինագծի երկրորդ ընթերցումը տեղի կունենա արդեն ԱԺ հաջորդ քառօրյա նիստերի ընթացքում: Հիշեցնենք` 2008 թվականի փետրվարի 24-ին Հայաստանի ԿԸՀ-ն հայտարարել էր, որ ընտրություններում հաղթել է Սերժ Սարգսյանը։ Բողոքի ակցիայի մասնակիցները պահանջում էին վերահաշվարկել քվեները։ Մարտի 1-ի գիշերը Ազատության հրապարակում ոստիկանական ուժերը օպերատիվ-հետախուզական գործողություններ էին իրականացրել «տեղանքը ստուգելու» համար, որի արդյունքում հազարավոր ցուցարարների հեռացրել էին հրապարակից։