Այսօր ավագանու հերթական նիստին «Լույս» խմբակցությունից Անի Խաչատրյանն արձագանքեց «Իմ քայլը» խմբակցության անդամ Էռնեստ Ավանեսովի ելույթի: «Էռնեստ Ավանեսովը նշեց, որ երկրապահի գրասենյակները գտնվում են մանկապարտեզի շենքերում: Նա չի հասկանում, թե ինչ ժառանգություն է դա: Ցավում եմ, պարո՛ն Ավանեսով, որ դուք չեք գիտակցում երկրապահի թողած ժառանգությունը: Այդ գրասենյակների մեծ մասը նաև թանգարաններ են, և եթե դուք չեք գիտակցում երկրապահի թողած ժառանգությունը, գնացեք Եռաբլուր, այնտեղ տղաները, միգուցե, կասեն, թե ինչ ժառանգություն է թողել երկրապահը: Երկրապահը ձեզ Արցախ է թողել, Հայաստանի Հանրապետություն է թողել և հիմա մոտ ապագայում, եթե նորից պատերազմ լինի, համոզված եմ՝ այս դահլիճում գտնվածների տասը տոկոսը չի գնալու սահման, երկրապահն է գնալու և՛ ձեր, և՛ ձեր երեխաներին պահելու: Իսկ դուք «ղումար» եք խաղում երկրապահի գրասենյակների վրա: Ամոթ է, մի քիչ հայրենասիրություններ ունեցեք»,-վրդովմունքով ասաց Անի Խաչատրյանը: Նա հույս հայտնեց, որ քաղաքապետը չի կիսում այն տեսակետը, որ երկրապահի թողած ժառանգությունը կարելի է քննարկման առարկա դարձնել: «Ո՞նց խնդրենք, որ հայրենասիրական դասեր չտան»,-արձագանքում էին դահլիճից: Երևանի քաղաքապետ Հայկ Մարությանը տեղին չհամարեց ավագանու անդամի այս ելույթը և նշեց, որ սերտ կապերի մեջ են Երկրապահ կամավորական միության հետ և հիմա քննարկում են, թե մանկապարտեզները ինչպես պետք է ձևափոխվեն: «Այնպես որ, հանգիստ եղեք այս հարցում, մենք միասին Երկրապահ կամավորական միության հետ գնում ենք առաջ»,-ասաց քաղաքապետը: Էռնեստ Ավանեսովը ևս արձագանքեց. «Խնդրում եմ քաղաքական շահարկումների մեջ չմտցնել յուրաքանչյուր բան, ինչ վերաբերում է Արցախին կամ հայրենասիրությանը: Եկեք կենսագրությունները իրար կողք դնենք և նայենք` ով ինչ է արել: Ես խնդրում եմ կոռեկտությունը պահպանել, և որևէ մեկը թող չխախտի կարգը»: