«Սանիթեքը» Երևանում պետք է ունենար 8000 աղբաման, այնինչ դրանք այժմ ընդամենը 5000-ն են. Մարության
Երևանի քաղաքապետարանը տիրապետո՞ւմ է այն ռեսուրսներին, որ եթե աղբատար մեքենաներ լինեն իր տրամադրության տակ, կարողանա կազմակերպել աղբահանությունը։ Այս մասին կառավարության այսօրվա նիստի ժամանակ քաղաքապետին հարցրեց վարչապետ Նիկոլ Փաշինյանը։
Հայկ Մարությանը բացատրեց, որ դա շատ բարդ տիրույթ է, ու բարդ է այդ ամենը կազմակերպելը, ու քանի որ քաղաքապետարանն այս տիպի աղբահանություն չի իրականացրել նախկինում, հիմա սկզբնական շրջանում բարդ կլինի այդ ամենն իրականացնել։ Մարությանի խոսքով, սակայն, չպետք է դիտարկել կարողանալ-չկարողանալը, քանի որ միևնույն է՝ դա պետք է արվի։
«Ամենահասարակ պահն այն է, որ, ենթադրենք, էսօր ընկերությունն ինքն իրեն ասի՝ լավ, ես թերանում եմ, համաձայն եմ, ես գնացի, և ի՞նչ ենք անում մենք։ Էս պահին՝ ոչ մի բան։ Կարող է տեսնենք 2012 թվի Նեապոլի իրավիճակը», – ասաց Փաշինյանը։
Փաշինյանը հարցրեց՝ աղբահանությունն իրականացնող ընկերությունը կատարե՞լ է այն ներդրումները, որ պետք է կատարեր։ Մարությանն ասաց, որ այդ մակարդակի չի կատարել․ չունի համապատասխան քանակի մեքենաներ ու տեխնիկա, իսկ անհրաժեշտ 8000 աղբամանի փոխարեն ունի ընդամենը 4800-5000 հատ, որից ընդամենը 1000 հատն է նորմալ վիճակում։
