Զարթոնքցիները հիմա էլ պահանջում են ազատել նախկին գյուղապետի թոռանը․ բողոքի ակցիա

Արմավիրի մարզի ընդհանուր իրավասության դատարանի դիմաց՝ Զարթոնք համայնքի արդեն նախկին գյուղապետ Պարույր Սարգսյանը և իր կողմնակիցները բողոքի ակցիա են իրականցնում: Պահանջում են ազատ արձակել գյուղապետ Պարույր Սարգսյանի թոռանը: Նրանք պարզել են պաստառներ՝ «Ազատություն Նարեկ Մելքոնյանին»: Հիշեցնենք, որ ապրիլի 13-ին գյուղապետի հրաժարականը պահանջողների և նրա կողմնակիցների միջև տեղի էր ունեցել միջադեպ, որն ուղեկցվել էր կրակոցներով: Հարուցվել է քրեական գործ ՀՀ քրեական օրենսգրքի 258-րդ հոդվածի 4-րդ մասով, այն է` խուլիգանությունը, որը զուգորդվել է անձի առողջությանը միջին ծանրության վնաս պատճառելով։ Իրականացված անհետաձգելի քննչական գործողությունների արդյունքում պարզվել են զինված միջադեպի մի շարք հանգամանքները: Խուլիգանություն կատարելու կասկածանքով 2 անձ ձերբակալվել են, ձերբակալվածներից մեկը նախկին գյուղապետի թոռն է: «Մենք մեր պատմության ուսուցչից՝ Նարեկ Մելքոնյանից, ոչ մի վատ բան չենք տեսել։ Նա մեղավոր չէ, պատկերացրեք, եթե հարձակվեն ձեր ընտանիքի վրա, ի՞նչ կանեք»,–նշեց բնակիչներից մեկը։ Զարթոնք գյուղի դպրոցի տնօրեն Հոռոմսիմ Սարգսյանը, ով նախկին գյուղապետի քույրն ավելի վաղ հայտնել էր, թե որդուն պաշտպանելու համար աշակերտական խորհուրդն է ոտքի ելել, նա վստահեցրել էր, որ ինքն այդ ամենի հետ կապ չունի: Եվ այսօր ցույցին մասնակցողների մեջ զգալի թիվ են կազմում երեխաները Պարույր Սարգսյանի կողմնակիցները պնդում են, որ բողոքող գյուղացիները ներխուժել են նրա դստեր տուն և միջադեպը գրանցվել է դրա պատճառով: Բողոքի ակցիայի մասնակից զարթոնքցիների մյուս կողմը հայտարարում է՝ Պարույր Սարգսյանի թոռը կրակոցներ է արձակել գյուղում ու վիրավորել համագյուղացուն, ուրեմն պետք է պատժվի: