Ադրբեջանի ԱԳՆ-ն արձագանքել է Փաշինյանիՙ Ստրասբուրգում արած առաջարկին
Ադրբեջանի ԱԳՆ-ն արձագանքել է Ստրասբուրգում ելույթ ունենալիս ՀՀ վարչապետ Նիկոլ Փաշինյանի հայտարարությանն առ այն, որ հայկական կողմը կոչ է անում Ադրբեջանին հրաժարվել ռազմատենչ հռետորաբանություն և սպառնալիքներ օգտագործելուց:
«Թրենդ» գործակալության հաղորդմամբՙ Ադրբեջանի արտգործնախարարությունը խորհուրդ է տվել Փաշինյանին ծանոթանալ ԵԱՀԿ-ի 1975-ի Հելսինկյան եզրափակիչ ակտին, մասնավորապես՝ «ուժի չկիրառման և ուժի կիրառման սպառնալիքից հրաժարվելու» սկզբունքին:
Ադրբեջանի ԱԳՆ-ն կրկին շեշտել է Հայաստանի զինված ուժերը Ղարաբաղից դուրս բերելու պահանջի մասին՝ «տարածաշրջանում անվտանգության ապահովման համար»:
Հիշեցնենք, որ Փաշինյանն այսօր, ելույթ ունենալով Եվրոպայի խորհրդի նախագահ Թորբյորն Յագլանդի հետ համատեղ մամուլի ասուլիսում, հայտարարել է, որ Երևանը Բաքվին առաջարկում է հրաժարվել «սպառնալիքների լեզվից», և հույս է հայտնել, որ ադրբեջանական կողմը կանսա այդ կոչին:
