Ձերբակալվել են Արմավիրում զինված ավազակային հարձակում կատարելու մեջ կասկածվողները

Ոստիկանության Արմավիրի մարզային վարչության ծառայողները ապրիլի 3-ին Արմավիրի բաժին են բերման ենթարկել 2 քաղաքացու՝ Արմավիրի մարզի Լենուղի գյուղի բնակիչ՝ 21-ամյա Սարգիս Աբելյանին ու Արմավիր քաղաքի բնակիչ՝ 18-ամյա Հակոբ Խաչատրյանին։ Ինչպես հայտնում է SHAMSHYAN. com–ը,վ երջինները կասկածվում են այս տարվա մարտի 21-ին Արմավիր քաղաքի 107-րդ թաղամասի թիվ 204 տան բնակիչներ՝ 49-ամյա Կարապետ Մարգարյանի և 35-ամյա Լաուրա Գրիգորյանի նկատմամբ հրազենի գործադրմամբ ավազակային հարձակում կատարելու մեջ։ Կասկածյալները քննիչի որոշմամբ ձերբակալվել են։ Նշենք, որ մարտի 21–ին, ժամը 20:10-ի սահմաններում, 2 դիմակավորված անձինք, մեկը զինված հրացանով, մյուսը՝ ատրճանակով, մտել էին Արմավիր քաղաքի 107 թաղամասի 204 տուն։Տանտերը՝ 49-ամյա Կարապետ Մարգարյանը, դիմադրություն էր ցուցաբերել, ինչի արդյունքում էլ հնչել էին կրակոցներ, այնուհետև 2 անձինք դիմել էին փախուստի: Փաստի առթիվ Արմավիրի մարզային քննչական վարչությունում ավազակային հարձակում կատարելու և ապօրինի զենք-զինամթերք կրելու, պահելու, օգտագործելու հատկանիշներով հարուցվել էր քրեական գործ: