Մանվել Գրիգորյանին դատին չէին բերել. նիստը հետաձգվել է
Երևանի ընդհանուր իրավասության դատարանում՝ դատավոր Մարինե Մելքոնյանի նախագահությամբ, այսօր պետք է քննվեր կալանքի տակ գտնվող Մանվել Գրիգորյանին գրավի դիմաց ազատ արձակելու հարցը։
Գրիգորյանի պաշտպան Լևոն Բաղդասարյանը NEWS. am-ին հայտնեց, որ իր պաշտպանյալին դատարան չեն բերել, քանի որ ստացիոնար բուժում է ստանում քաղաքացիական հիվանդանոցում։ Նա տեղեկացրեց, որ Գրիգորյանին ազատ արձակելու համար դատարանին առաջարկելու են 10 մլն․ դրամի չափով գրավ։ Հաշվի առնելով, որ դատավոր Մարինե Մելքոնյանն այլ գործով խորհրդակցական սենյակում էր, այսօրվա դատական նիստը հետաձգվեց։
Հիշեցնենք, որ Մանվել Գրիգորյանը մարտի 25-ին «Երեւան-Կենտրոն» ՔԿՀ-ից տեղափոխվել է «Նաիրի» բժշկական կենտրոն։
Նրան առաջիկայում կհետազոտի Փարիզում հայտնի ուռուցքաբան Նորբերտ Ավետյանը։ NEWS. am–ի տեղեկություններով՝ հայտնի ուռուցքաբանը Հայաստանում է եւ Գրիգորյանի հարազատները դիմել են նրան, որպեսզի հետազոտի կալանքի տակ գտնվող գեներալին։
