Երևանում ներկում են «կարմիր գծերը», վարչապետին էլ հորդորում են կատարել խոստումը և վերացնել դրանք
Երևանի ավագանու նախկին անդամ Սոնա Աղեկյանի ֆեյսբուքյան ուղիղ եթերից տեղեկանում ենք, որ «Հանուն արդարության» հասարակական վերահսկողական նախաձեռնությունը հայտարարված համապետական շաբաթօրյակի շրջանակում կատարում է ակցիա-հիշեցում՝ կարմիր գծերով սահմանազատված ավտոկայանատեղիների վերացման անհրաժեշտության դեմ:
Նախաձեռնության անդամները պնդում են` իրենք իրականացնում են հասարակական պահանջ, այս պահանջը ձևավորվել է դեռևս հեղափոխությունից առաջ, և այդ մասին բազմիցս հայտարարություններ է արել երկրի ներկայիս վարչապետ, նախկին պատգամավոր Նիկոլ Փաշինյանը, որը ԱԺ հարթակից պահանջել է կարմիր գծերը վերացնել:
tert am-ի թղթակիցը տեղեկացնում է, որ նրանք հավաստիացնում են, որ կա հանրային պահանջ` վերացնելու կարմիր գծերը: «Այսօր մենք դուրս ենք եկել այդ հանրային պահանջն իրականացնելու և ներկում ենք կարմիր գծերը՝ փաստելով, որ դրանք մեզ այլևս պետք չեն: Մենք օրինակ ենք ծառայում, հիշեցնում ենք վարչապետին, որ սա իր խոստումն է և պետք է կատարի»,- նշում են խմբի անդամները և նկատում, որ երբ ապամոնտաժում էին Օպերայի սրճարանները, քաղաքապետը նշում էր, որ իրականացնում են հանրային պահանջ, և դա ոչ թե քաղաքապետարանի ու վարչապետի որոշումն է, այլ ժողովրդի պահանջը:
«Հիմա վաղուց ժողովրդի պահանջն է եղել, որ չլինեին այս կարմիր գծերը, ի՞նչն է խնդիրը, որ չի սկսվում կարմիր գծերի հանման մեկնարկը. մենք տալիս ենք այդ մեկնարկը»,- ասացին նրանք և հավելեցին, որ միգուցե վարչապետը մոռացել է, բայց սա կլինի հիշեցում:
«Պարո´ն վարչապետ, կատարեք Ձեր խոստումները, ժողովուրդը Ձեզնից դա է սպասում»,- ասաց խմբի անդամներից մեկը:
Խմբի մեկ այլ անդամ էլ հավելեց, որ հասույթը «կարմիր գծերից» տարեկան կազմում է 26 մլրդ դրամ:
«Դա շաբաթական 1 մլն դոլար է, որը մեզնից յուրաքանչյուրից գողացվում է և անհասկանալի է, թե ինչի վրա են դրանք ծախսվում: Ունենք բազմաթիվ խնդիրներ, որոնց վրա գումար չի ծախսվում: Հիմա քաղաքապետ Հայկ Մարությանին ասում ենք` հաշվետու եղեք` ո՞ւր են մեր գումարները, ինչի վրա են ծախսվել»,- ասաց նա և կրկին նշեց, որ իրենք կատարում են հանրային պահանջը, որը նախահեղափոխական խոստումների շարքերում է եղել և հնչել է վարչապետի շուրթերից:
